ہاتھرس سانحہ: متاثرہ کو انصاف دلانے کے لیے کینڈل مارچ

ریاست اتر پردیش کے ہاتھرس میں گینگ ریپ کا شکار ہوئی متاثرہ کے ساتھ ہوئی درندگی کے بعد دہلی کے صفدر جنگ اسپتال میں موت ہوجانے کے بعد سے لوگوں میں شدید غصہ ہے۔

متاثرہ کو انصاف اور ملزمین کو پھانسی کا مطالبہ لیکر جگہ جگہ سڑکوں پر احتجاج کر رہے ہیں۔ آج مرادآباد کے پیلی کوٹھی علاقے سے خواتین اور مردوں نے ہاتھوں میں کینڈل لیکر یوگی حکومت کے خلاف نعرے بازی کی۔

اس دوران جلوس کی شکل میں کینڈل مارچ نکالا اور مطالبہ کیا کہ اگر متاثرہ کو انصاف نہیں دیا گیا، تو ملک بھر میں دلت معاشرے کے لوگوں کا ایک بڑا احتجاج ہوگا۔

خیال رہے کہ 14 ستمبر کو ہاتھرس میں متاثرہ اپنی ماں کے ساتھ مویشیوں کے لیے چارہ لینے گئی تھی۔ الزام ہے کہ اس وقت گاؤں کا ہی ایک نوجوان آیا اور متاثرہ کو گھسیٹتے ہوئے لے گیا، جہاں اس نے تین دیگر ساتھیوں کے ساتھ جنسی زیادی کی۔ صرف یہی نہیں ملزم نے متاثرہ کا گلا گھونٹنے کی کوشش کی۔

اس دوران ملزم نے اسے اتنا مارا پیٹا کہ وہ بے ہوش ہوگئی۔ بیہوش ہونے کے بعد ملزم نے متاثرہ کو مردہ سمجھ کر اسے کھیت میں ہی چھوڑ دیا۔

اس کا پتہ اہل خانہ کو چلا تو فوراً ہی اسے ضلع ہسپتال لے گئے جہاں سے انہیں علی گڑھ ریفر کردیا گیا۔ علی گڑھ کے بعد دہلی کے صفدرجنگ ہسپتال ریفر کردیا گیا، جہاں علاج کے دوران متاثرہ کی موت ہو گئی تھی۔