بریلی: عمرہ کے ویزا پر عائد پابندی کے خاتمہ سے عوام میں خوشی کی لہر

سعودی عرب حکومت نے رواں برس سفر حج کو محدود کر دیا ہے، صرف سعودی عرب میں مقیم افراد کو ہی عازمین حج کے طور پر تسلیم کیا جائے گا اور اُنہیں کو حج کرنے کی اجازت ہوگی۔ سعودی عرب حکومت کے اس فیصلہ کے بعد لوگوں میں مایوسی کا ماحول ہے۔

اطلاع کے مطابق سعودی حکومت نے عمرہ پر عائد پابندی کو ختم کرتے ہوئے عمرہ کے ویزا کو دوبارہ بحال کر دیا ہے، جس کے باعث ضلع بریلی میں تمام عازمین، ایجنٹ اور ٹور آپریٹرس میں خوشی کا ماحول ہے۔

بریلی حج سیوا سوسائٹی کے بانی پمّی خان وارثی نے بتایا کہ ذرائع کے مطابق جو اطلاع موصول ہو رہی ہے، اُس کے مطابق رواں برس نو ستمبر سے عمرہ کے لیے ویزا کو بحال کیا جا سکتا ہے، کووڈ 19 کی وجہ سے گزشتہ دو برسوں سے عمرہ کے سفر پر پابندی عائد تھی لیکن اب یہ پابندی ہٹنے سے لوگوں کو سفر عمرہ پر جانے کا موقع ملے گا۔

حج وعمرہ ٹور آپریٹرس گروپ کے صدر اور پرائیویٹ ٹور اینڈ ٹریول کے ایم ڈی عاصم حسین قادری کا کہنا ہے کہ سعودی عرب حکومت سے موصولہ اطلاعات کے مطابق عمرہ کی خواہش رکھنے والے تمام شہریوں کو عمرہ کے مبارک سفر کی جلد ہی اجازت مل جائے گی۔