اترپردیش کے ضلع بریلی کی حج سیوا سوسائٹی نے شہر اور اطراف میں فارم تقسیم کرنے کے اپنے مراکز کا بھی اعلان کیا ہے۔ جہاں سے عازمین سہولت کے ساتھ فارم حاصل کر سکتے ہیں۔
بریلی حج سیوا سوسائٹی کے مطابق حج کمیٹی آف انڈیا نے سنہ 2020 کے سفر حج کے لیے گزشتہ 10 اکتوبر سے درخواست لینا شروع کر دیا ہے اور یہ سلسلہ آئندہ ماہ 10 نومبر تک جاری رہےگا۔
بریلی حج سیوا سوسائٹی کے بانی پمّی خاں وارثی نے بتایا کہ حج درخواست کے لیے 300 روپیہ کی فیس بینک میں جمع کرنی ہوگی اور بلڈ گروپ کی کٹیگری درخواست میں اندراج کرنی ہوگی۔
اہم بات یہ ہے کہ درخواست کو صاف الفاظ میں پُر کرکے ایک فوٹو بھی لگانا ہے۔ اس بات کا خاص خیال رکھا جائےگا کہ فوٹو بنواتے وقت بیک گرائنڈ سفید ہونا لازمی ہے۔ ایسا نہ کرنے کی صورت میں فوٹو پر اعتراض بھی داخل ہو سکتا ہے لہذا اس شرط کا خاص خیال رکھا جائے۔
یہ فوٹو فارم میں چسپاں کرکے پاسپورٹ کی فوٹو کاپی، بینک کی پے اِن سلپ وغیرہ کو اپنے صوبہ کی حج کمیٹی کو کوریئر یا رجسٹری سے بھیج دیں۔
سوسائٹی کے اہم فرد عاصم حسین نے مزید اطلاع دیتے ہوئے کہا ہے کہ شہر کے اسلامیہ گرلز انٹر کالج میں واقع دفتر سے فارم حاصل کیے جا سکتے ہیں۔ سوسائٹی کے جنرل سکریٹری انجینئر انیس احمد خاں نے کہا ہے کہ عازمین حج اپنے پاسپورٹ بنوانے کے لیے ابھی سے سی عرضی داخل کردیں اور وہیں دوسری جانب حج کا درخواست فارم بھی لے کر اسے پورا کرنا شروع کر دیں۔
پاسپورٹ آنے کے بعد اُس کی فوٹو کاپی اور نمبر فارم میں اندراج کردیں۔ دونوں کاموں کو ایک ساتھ کرنے سے وقت ضائع نہیں ہوگا۔
