Gufraan Maab Memory لکھنؤ کی ایران و عراق کی علمی و مالی مدد ناقابل فراموش

مولانا مصطفیٰ حسین نقوی اسیف جائسی نے کہا کہ حضرت غفران مآب کا پورے برصغیر پر احسان ہے اس لیے ہمیں ان کے کارناموں کو منصہ شہود پر لانا چاہیے۔ ایک وہ وقت تھاکہ جب لکھنؤ نے ایران و عراق کی علمی و مالی مدد کی تھی، آج انہیں چاہیے کہ وہ لکھنؤ کو ہرگز فراموش نہ کریں، اور لکھنو کی ایران و عراق کی مدد ناقابل فراموش ہے۔ Gufraan Maab Memory

لکھنؤ: عالم اسلام کی بزرگ شخصیت اور مکتب تشیع کے احیاگر آیت اللہ العظمیٰ سید دلدار علی غفران مآبؒ کی یاد میں ادارہ ’’مکتب فقہی و کلامی حضرت غفران مآب‘ ‘ کی جانب سے ’یاد غفران مآب‘کانفرنس کا انعقاد عمل میں آیا۔ یہ پروگرام پکچر گیلری کے روبرو ادارہ کے دفتر میں منعقد ہوا۔ اس پروگرام میں ایران کے معروف محقق حجۃ الاسلام شیخ مہدی اسفند یاری نے کلیدی خطبہ پیش کیا۔ صدارت کے فرائض مولانا کلب جواد نقوی نے انجام دیے۔ پروگرام کا آغاز قاری مولوی صائم رضا نے تلاوت کلام پاک سے کیا۔ اس کے بعد مولانا اسیف جائسی کے فرزند محمد اعدل سلمی نے حضرت غفران مآب کی شان میں منظوم خراج عقیدت پیش کیا۔

Gufraan Maab Memory

تعارفی کلمات پیش کرتے ہوئے ’مکتب فقہی و کلامی لکھنؤ‘ کے مسئول مولانا مصطفیٰ حسین نقوی اسیف جائسی نے پروگرام کی مقصد اور افادیت کو بیان کرتے ہوئے کہا کہ حضرت غفران مآب کا پورے برصغیر پر احسان ہے اس لیے ہمیں ان کے کارناموں کو منصہ شہود پر لانا چاہیے۔ ایک وہ وقت تھاکہ جب لکھنؤ نے ایران و عراق کی علمی و مالی مدد کی تھی، آج انہیں چاہیے کہ وہ لکھنؤ کو ہرگز فراموش نہ کریں۔ کلیدی خطبہ پیش کرتے ہوئے معروف اسکالر حجۃ الاسلام شیخ مہدی اسفند یاری نے کہا کہ حضرت غفران مآب برصغیر کی شیعیت کے مروج ہیں۔ ان کے خدمات اظہر من الشمس ہیں جنہیں رہتی دنیا تک یاد رکھا جائے گا۔ انہوں نے کہا کہ حضرت غفران مآبؒ کی عظمت کی افہام و تفہیم کے لیے ان کے شاگردوں اور اس عہد کے علماء کی کتابوں اور تحریروں کا مطالعہ نہایت اہم ہے۔ مثال کے طور پر علامہ مفتی محمد قلی کی کتاب ’’احکام عدالت علویہ ‘‘ کا مطالعہ کیا جائے جس میں انہوں نے آیت اللہ غفران مآبؒ کو کتنے احترام اور القابات و خطابات کے ذریعہ یاد کیا ہے۔

Gufraan Maab Memory

انہوں نے حضرت غفران مآب کو ہندوستان میں امامیہ طریقے پر نماز جمعہ و جماعت کا مروج بھی قرار دیا۔ شیخ مہدی اسفند یاری نے حضرت غفران مآب کی حیات اور خدمات پر تفصیلی روشنی ڈالتے ہوئے بعض کتابوں کا اجمالی جائزہ بھی پیش کیا جن میں الرمح المصقول، احکام عدالت علویہ، عبقات الانوار، شہاب ثاقب، عماد الاسلام سمیت دیگر کتابیں شامل رہیں۔ انہوں نے حجۃ الاسلام محمد تقی سبحانی، آقائی شیخ مختاری اور نمائندہ ولی فقیہ در ہند حجۃ الاسلام شیخ مہدی مہدوی پور کا پیغام بھی پڑھا جس میں مکتب لکھنؤ کی تاریخ اور اس کی عظمت پر تفصیلی روشنی ڈالی گئی تھی۔

صدارتی تقریر کرتے ہوئے مولانا کلب جواد نقوی نے کہا کہ ایران میں اس وقت مکتب حضرت غفران مآبؒ پر نمایاں کام ہورہا ہے۔ ہمیں اس پر بے حد خوشی ہے۔کیونکہ جو کام ہمیں کرنا چاہیے تھا وہ ایران و عراق کے محققین کررہے ہیں۔ ان شاء اللہ اس کانفرنس کے بعد آئندہ اس سلسلے میں مزید پیش رفت ہوگی اور متعدد کانفرنسوں کا انعقاد عمل میں آئے گا۔ مولانا نے کہا کہ حضرت غفران مآب نے اس وقت مکتب تشیع کی تبلیغ و ترویج کے لیے کوششیں کیں جس وقت شیعیت مختلف نظریات اور رسومات سے گھری ہوئی تھی۔

انہوں نے اخباریت اور تصوف کی نمود و نمائش کے خلاف کتابیں لکھیں اور شیعیت کے امتیازات کو بیان کیا۔ اس وقت شیعوں کی بحیثیت قوم کوئی شناخت نہیں تھی اس لیے انہوں نے شیعوں کی الگ نماز جمعہ و جماعت قائم کی۔ ساتھ ہی قبرستان وقف کیا۔ امام باڑہ تعمیر کروایا اور اپنا الگ مدرسہ قائم کیا جس میں مکتب امامیہ کی بنیادی تعلیمات کے درس کا سلسلہ شروع ہوا۔ اس مدرسے سے اہم شخصیات نے کسب فیض کیا اور انہوں نےہندوستان بھر میں مکتب تشیع کی تبلیغ و ترویج کی۔ مولانا نے کہا کہ خطۂ اودھ میں علماء کی خدمات محتاج تعارف نہیں ہیں، لیکن ان کے آثار کے احیاء اور تحقیق کی ضرورت ہے۔

نظامت کے فرائض عادل فراز نقوی نے انجام دی۔ پروگرام کے کنوینر احمد عباس نقوی تھے جو ادارہ ’مکتب فقہی و کلامی لکھنؤ‘ کے جنرل سکریٹری بھی ہیں۔ پروگرام میں مولانا نثار احمد زین پوری، مولانا ممتاز جعفر، مولانا سرتاج حیدر زیدی، مولانا تقی رضا، مولانا شباہت حسین، مولانا زوار حسین، مولانا سعیدالحسن نقوی، مولانا مشاہد عالم رضوی، مولانا ڈاکٹر ارشد جعفری، مولانا حیدر عباس رضوی، مولانا اصطفیٰ رضا، مولانا عقیل عباس، مولانا نذر عباس، مولانا غلام رضا، مولانا علی حیدر، مولانا احمد رضا، مولانا شاہنواز حیدر، صحافت کے مدیر امان عباس، معروف صحافی حسین افسر، ڈاکٹر امانت حسین، دہلی سے سیف نقوی اور دیگر اہم افراد نے شرکت کی۔