گونڈہ: خاتون کانسٹیبل کی مشتبہ حالت میں موت

اترپردیش کے ضلع گونڈہ کے موتی گنج تھانے میں تعینات ایک خاتون سپاہی کی مشتبہ حالت میں موت ہوگئی۔

پولیس ذرائع نے بتایا کہ خاتون سپاہی کنک سنگھ موتی گنج تھانہ علاقہ میں واقع سرکاری رہائش گاہ پر رہ رہی تھی۔

آج صبح اچانک اس کی طبیعت بگڑ گئی۔ تبھی پڑوس کے کوارٹر میں رہ رہی خاتون سپاہی اس کو علاج کے لئے ضلع ہسپتال لے گئی جہاں ڈاکٹروں نے اسے مردہ قرار دے دیا۔

متوفی کانسٹیبل بلیا کی رہنے والی ہے۔ اس نے 2018 بیچ میں پولیس میں تقرری حاصل کی تھی۔ انہوں نے بتایا کہ لاش کا پوسٹ مارٹم کرا کر لاش کو اہل خانہ کو سونپ دیا گیا ہے۔