بارہ بنکی: غریب کلیان دیوس منایا گیا

پنڈت دین دیال اپادھیائے کی سالگرہ کے موقع پر ریاست اترپردیش کے بارہ بنکی میں 'غریب کلیان دیوس' جوش و خروش کے ساتھ منایا گیا۔

اترپردیش کے بارہ بنکی کےتمام 15 بلاکز میں حکومتی اسکیمز کے استفادہ کنندوں میں سند تقسیم کی گئی اور انہیں حکومت کی تمام اسکیمز کے تئیں بیدار بھی کیا گیا۔ شہر کے بنکی بلاک کے احاطے میں حکومت کی اسکیمز کی نمائش لگائی گئی۔ ساتھ ہی اس کے اہل افراد کا اندراج بھی کیا گیا۔

اس کے علاوہ بنکی بلاک کے آڈیٹوریم میں ایک تقریب کا اہتمام کیا گیا۔ جس کو خطاب کرتے ہوئے رکن پارلیمان اوپیندر راوت نے کہا کہ پنڈت دین دیال اپادھیائے کے خواب کو مکمل کرنے کے لیے وزیراعظم نریندر مودی اور وزیراعلیٰ یوگی آدتیہ ناتھ مسلسل کام کررہے ہیں۔

انھوں نے کہا کہ حکومت حاشیے پر کھڑے لوگوں کے لئے مختلف قسم کی اسکیمز چلارہی ہے۔ انہوں نے مزید کہا کہ ملک کی ترقی کے لئے ضروری ہے کہ عام آدمی بھی اس سمت حکومت کا تعاون کرے اور ان اسکیمز سے استفادہ کرے۔ وہیں تقریب کی صدارت کررہی سی ڈی او ایکتا سنگھ نے کہا کہ یوم غریب بہبود منانے کا مقصد عوام کو حکومت کی اسکیمز کے تئیں بیداری لانا ہے۔