فائر بریگیڈ گاڑی کی زد میں آنے سے نوجوان کی موت

قومی دارالحکومت دہلی سے متصل نوئیڈا میں فائر بریگیڈ گاڑی کی زد میں آنے سے بائیک سوار کی موقع پر ہی موت ہوگئی۔

یہ حادثہ شہر کے تھانہ فیس 2 کے ڈی 39 کمپنی کے باہر سڑک پر پیش آیا۔ اطلاع کے مطابق فائر بریگیڈ گاڑی کا ڈرائیور نشے میں تھا۔

ہلاک نوجوان کا نام منوج وشو کرما تھا اور وہ اتر پردیش کے چندولی میں رہتا تھا۔ وہ بذریعہ موٹر سائیکل ڈیوٹی پر جا رہا تھا کہ حادثے کا شکار ہوگیا۔

تفصیلات کے مطابق فائر بریگیڈ گاڑی کا ڈرائیور شراب پی کر گاڑی چلا رہا تھا اور اس نے وردی بھی نہیں پہنی تھی لیکن حادثے کے بعد اس نے فوراً یونیفارم پہن لیا۔

حادثے کے بعد قریبی کمپنیوں کے ملازمین اکٹھا ہوگئے اور پولیس کو اطلاع دی۔

پولیس کے مطابق لواحقین کی شکایت پر ایف آئی آر درج کر کے فائر بریگیڈ کے ڈرائیور کو گرفتار کر لیا گیا۔