اترپردیش: ماتم کرنے پر ایف آئی آر درج

کورونا وبا کے چلتے اترپردیش حکومت نے امسال محرم الحرام میں عزاداری، ماتم، مجالس اور تعزیہ داری کی اجازت نہیں دی۔ باوجود اس کے کچھ لوگوں نے سڑک پر ماتم کیا، جس کے بعد ان پر پولیس کارروائی ہوئی۔

اترپردیش کے دارلحکومت لکھنؤ کے چوک علاقے میں واقع آغا باقر امام باڑہ میں مجلس کے بعد کچھ لوگ باہر آ کر ماتم کرنے لگے۔

پولیس کے مطابق ان لوگوں کو ایسا کرنے سے منع کیا گیا، جس کے بعد زیادہ تر لوگ اپنے گھروں کو واپس چلے گئے لیکن سات افراد ماتم کرتے رہے۔

ڈی سی پی سروشریسٹھ ترپاٹھی کے مطابق سات لوگوں پر ایف آئی آر درج کی گئی ہے۔ ان میں سے شہنشاہ نامی شخص کو امن و امان خراب کرنے کے جرم میں گرفتار کیا گیا ہے۔

قابل ذکر ہے کہ امام باڑہ آغا باقر میں مجلس ہو رہی تھی جس میں صرف پانچ لوگ شامل تھے لیکن باہر کچھ لوگ جمع ہو گئے اور ماتم کرنے لگے۔

پولیس کے منع کرنے کے باوجود سات افراد ماتم کرتے رہے جس پر کورونا ایکٹ کے تحت کارروائی کرتے ہوئے ایف آئی آر درج کر لی گئی حالانکہ اس کے بعد اس طرح کا کوئی معاملہ پیش نہیں آیا۔