بریلی: فوم فیکٹری میں بھیناک آتشزدگی

ریاست اترپردیش کے بریلی ضلع کی مشہور اشوکا فوم فیکٹری میں بھیانک آگ لگی، جس کی وجہ کروڑوں روپئے لاگت کا سامان جل کر خاکستر ہوگیا۔

تقریباً ایک درجن سے زائد فائر برگیڈ گاڑیاں آگ بجھانے کی کوشش کر رہی ہیں۔ تفصیلات کے مطابق چوبیس گھنٹے چلنے والی اشوکا فوم فیکٹری میں شام کو تیسری شفٹ میں اہلکار کام کر رہے تھے۔ اس دوران گدّوں میں آگ لگی، کچھ ہی لمحوں میں آگ نے خطرناک صورت اختیار کر لی اور دیکھتے ہی دیکھتے فیکٹری کے مختلف حصّوں میں پھیل کر شعلوں میں تبدیل ہوگئی۔ آگ اتنی شدید تھی کہ دو فائر برگیڈ گاڑیوں کی کوشش رائگاں ثابت ہوئیں۔ ضلع انتظامیہ کے حرکت میں آنے کے بعد فائر برگیڈ کی تقریباً ایک درجن سے زائد گاڑیاں موقع پر پہنچیں اور آگ کو مزید بڑھنے سے روکا۔ تاہم آتشزدگی کی اصل وجہ کا ابھی پتہ نہیں چل پایا ہے۔
لحاف، تکیہ، صوفہ اور کُرسی کے علاوہ گھریلو ضرورتوں کا سامان بنانے والی اشوکا فوم کمپنی ملک بھر میں اشیا سپلائی کرتی ہے، مذکورہ کمپنی کی اشیا نہ صرف بھارت بلکہ بیرون ممالک بھی درآمد کی جاتی ہیں۔