سہارنپور علاقہ کے ٹپری جنکشن پر بھارتیہ کسان یونین نے 12بجے سے لے کر4 بجے تک ڈیرہ ڈالے رکھا۔
گزشتہ تین مہینے سے چل رہی کسانو ں کی تحریک کے چلتے جہاں حکومت زرعی قوانین کو واپس لینے کے کسانوں کے مطالبے کو پورا نہیں کررہی ہے وہیں کسان پرزور طریقے سے احتجاجی مظاہرہ کرتے ہوئے متنازعہ زرعی قوانین کو واپس لینے کی ضد پر اڑے ہوئے ہیں۔
کسانوں نے سہارنپور ریلوے اسٹیشن پر ٹرینوں کو روک دیا ، تقریباً 4سے 5گھنٹے ٹرین ریلوے اسٹیشن پر کھڑی رہی جس سے مسافروں کو بڑی پریشانیوں کا سامنا کرنا پڑا۔ مسافر اس قدر پریشان تھے کہ وہ انتظامیہ سے بار بار مطالبہ کررہے تھے کہ انہیں جلد سے جلد یہاں سے روانہ کیا جائے تاکہ وہ اپنی منزل تک پہنچ سکیں۔
بعد ازاں کسانوں نے تینوں قوانین کے خلاف ایک میمورنڈم بھی افسران کو سونپا۔ اس دوران پولیس فورس موقع پر موجود تھی۔