Farmers Commando Team: نوئیڈا کے کسانوں کا احتجاج جاری، کسان کمانڈو ٹیم تشکیل

نوئیڈا اتھارٹی Noida Authority کے خلاف اتر پردیش کے نوئیڈا میں 81 گاؤں کے کسانوں کا جاری احتجاج Farmers Protest اب شدت اختیار کر چکا ہے۔ بھارتیہ کسان پریشد Bhartiya Kisan Parishad نے گاؤں گاؤں جا کر کسان کمانڈو ٹیم Farmers Commando Team بنانا شروع کر دیا ہے۔ ہفتہ کے روز پانچ دیہات میں ٹیمیں تشکیل دی گئیں ہیں، جو کسانوں کو ہر طرح سے تحفظ فراہم کریں گی۔

نوئیڈا کے کسانوں نے اعلان کیا ہے کہ پیر سے کسان اپنی بھینسیں اتھارٹی کے گیٹ پر باندھ کر وہیں چولہا جلائیں گے۔ وہیں اس معاملے پر بھارتیہ کسان پریشد Bhartiya Kisan Parishad کے صدر سکھویر پہلوان نے کہا کہ کسانوں کا احتجاج 88ویں دن بھی جاری ہے اور کسان اپنے مطالبات پورے کیے بغیر احتجاج ختم نہیں کریں گے۔

انہوں نے کہا کہ احتجاج کے پیش نظر متعدد گاؤں شرف آباد، ممورا، گیجھا شاہ پور اور ہوشیار پور میں کسان کمانڈوز کی ٹیم تشکیل دی گئی ہے۔ یہ ٹیم دیگر گاؤں میں بھی تشکیل دی جائے گی۔ کسانوں کو کسی بھی قسم کی پریشانی کی صورت میں یہ ٹیم فوری طور پر موقع پر پہنچ کر ان کی مدد کرے گی۔

انہوں نے کہا کہ کسانوں کا احتجاج گزشتہ تقریباً تین ماہ سے جاری ہے اور ان کی کوئی سنوائی نہیں ہو رہی ہے اور اب پیر سے کسان اپنی بھینسیں خود اتھارٹی کے گیٹ پر باندھیں گے اور وہیں اپنا چولہا بھی جلائیں گے۔ اس بار کسان یقین دہانیوں پر یقین نہیں کریں گے اور اپنے مطالبات پورے ہونے کے بعد ہی احتجاج ختم کریں گے۔