رامپور: کسانوں کا غیر معینہ مدت کا احتجاجی مظاہرہ جاری

اترپردیش کی یوگی حکومت کے خلاف کسانوں کا غصہ تھمنے کا نام نہیں لے رہا ہے۔ ریاست اترپردیش کے رامپور میں ضلع انتظامیہ دفتر پر گذشتہ دو روز سے ضلع کے کاشتکار اپنی متعدد مانگوں کو لیکر غیر معینہ مدت کا احتجاجی مظاہرہ کر رہے ہیں۔

بھارتی کسان یونین ٹکیت کی قیادت میں اترپردیش میں کسان سراپا احتجاج کر رہے ہیں۔ اپنی مختلف مانگوں کو لیکر رامپور کے کاشتکار گذشتہ دو روز سے ڈسٹرکٹ مجسٹریٹ کے دفتر کے سامنے کلکٹریٹ کے احاطے میں غیر معینہ مدت تک کے لیے احتجاجی مظاہرے کر رہے ہیں۔

ای ٹی وی بھارت سے بات کرتے ہوئے بھارتی کسان یونین کے ضلع صدر حسیب احمد نے کہا کہ ریاست کی یوگی حکومت کسانوں سے وعدے کرکے مکر رہی ہے۔

انہوں نے کہا کہ یوگی جی اور ان کی انتظامیہ مسلسل کسانوں کو بیوقوف بنا رہے ہیں۔ کسانوں کو ان کی لاگت کی صحیح رقم نہیں دی جا رہی ہے۔

انہوں نے ضلع انتظامیہ کو اپنی سخت تنقید کا نشانہ کہا کہ اگر کسانوں پر بقایا رہ جاتا ہے تو ان سے کسی بھی طرح وصول کر لیا جاتا ہے، لیکن بڑے بڑے صنعت کاروں کو رعایات دی جاتی ہیں۔

اس موقع پر بی کے یو کے ضلع صدر نے یہ بھی کہا کہ کسان مرکزی حکومت کے کسان مخالف قوانین کے بھی خلاف ہے۔ جو بہت ہی جلد پارلیمنٹ پاس بل پاس کراکر بنا دیے گئے۔ انہوں نے کہا کہ یہ تینوں قانون سراسر کسان مخالف ہیں۔ اس لئے ہم اس کی مخالفت کرتے رہیں گے۔