عید الفطر پر عید گاہ ویران

ملک کی تاریخ میں یہ پہلا موقع ہوگا جب عید کی نماز عیدگاہ یا مساجد میں باجماعت ادا کرنے کے بجائے لوگ اپنے اپنے گھروں میں پڑھیں گے کیوںکہ حکومت نے مساجد یا عیدگاہ میں باجماعت نماز یا کسی بھی قسم کے اجتماع کی اجازت نہیں دی ہے۔

عیدگاہ وہ خصوصی جگہ ہے جہاں عیدالفطر اور عیدالاضحیٰ کی نماز ادا کی جاتی ہے اور تمام اہل اسلام میں بڑی تعداد ایسی ہے جو صرف عیدگاہ میں ہی عیدالفطر کی نماز ادا کرتی ہے لیکن اس دفعہ لاک ڈاؤن نافذ ہونے کی وجہ سے بارہ بنکی سمیت تمام اضلاع میں عیدگاہیں ویران رہیں گی۔

نمازیوں کے لیے یہ پہلا تجربہ ہوگا جب وہ عید الفطت کی نماز گھر میں پڑھیں گے، مصلیان با جماعت کی اہمیت کو بخوبی سمجھتے ہیں لیکن روایت سے الگ ہو کر عیدالفطر کی نماز ادا کرنا ان کی مجبوری ہے۔

دوسری جانب عید سے کچھ روز قبل صاف، شفاف اور گلزار سی نظر آنے والی عیدگاہ میں نماز نہ ہونے کی وجہ سے وہاں صاف صفائی بھی نہیں کی گئی۔

عیدگاہوں میں بڑی بڑی جھاڑیاں لگی ہوئی ہیں جبکہ عید سے قبل تک عیدگاہ کا رنگ روغن سے لے کر تمام ضروری کام کئے جاتے تھے۔