ریاست اترپردیش میں کورونا وبا کے بڑھتے ہوئے پھیلاؤ کے مدنظر ریاستی حکومت نے 31 مئی تک لاک ڈاؤن نافذ کیا تھا۔لیکن اب کورونا مثبت مریضوں کی تعداد میں آرہی کمی کو دیکھتے ہوئے ریاستی حکومت نے اہم فیصلہ لیا ہے۔حکومت کی جانب سے جاری کردہ نئی گائیڈلائن کے مطابق ریاست کے جن اضلاع میں مثبت معاملات کی تعداد 600 سے کم ہے، ان اضلاع میں لاک ڈاؤن کو ہٹا دیا گیا ہے۔وہیں جس اضلاع میں کورونا کی تعداد 600 سے زائد ہے، وہاں لاک ڈاؤن نافذ رہے گا۔
اسی کے مدنظر ضلع مظفرنگر میں بھی سات جون تک کے لیے لاک ڈاؤن نافذ کیا گیا تھا، لیکن اب مظفرنگر میں کورونا معاملات میں آرہی کمی کے سبب آج سے لاک ڈاؤن کو شرائط کے مطابق ہٹا دیا گیا ہے۔
کورونا مثبت کیسز میں کمی نظر آنے کے بعد مظفرنگر سے لاک ڈاؤن ہٹا
ضلع مظفر نگر میں کورونا مثبت مریضوں کی تعداد میں مسلسل کمی آرہی ہے۔ اب مظفر نگر میں کورونا مثبت مریضوں کی تعداد 562 رہ گئی ہے اور کورونا گائیڈلائن کے شرائط کے مطابق آج سے لاک داؤن ہٹا دیا گیا ہے۔
لاک ڈاؤن کو صبح سات بجے سے شام سات بجے تک کے لیے ہٹا دیا گیا ہے۔ لاک ڈاؤن کے ہٹنے سے ضلع مظفر نگر کی عوام، دکاندار اور تاجروں میں خوشی کا ماحول ہے۔ بازاروں میں بھی ایک بار پھر سے رونق دیکھی گئی۔وہیں پولیس انتظامیہ بھی پوری طرح سے مستعد نظر آرہی ہے۔ بازاروں میں ماسک نہیں لگانے والے لوگوں کو سخت ہدایت دی گئی اور کچھ کے چالان بھی کاٹے گئے ہیں ۔
لاک ڈاؤن کھلنے سے متعلق جب ای ٹی وی بھارت اردو کی ٹیم نے کچھ دکانداروں سے بات چیت کی تو انہوں نے ہمیں بتایا کہ لاک ڈاؤن کے کھلنے سے ہمیں کافی راحت ملی ہے۔ لاک ڈاؤن کے سبب بند پڑے کاروبار سے ہمیں کافی مشکلات کا سامنا کرنا پڑ رہا تھا۔ اب لاک ڈاؤن کھلا ہے تو ہمیں کافی راحت ملی ہے۔ دکانوں پر گاہک بھی دھیرے دھیرے آنے شروع ہو گئے ہیں۔ ایک بار پھر سے بازاروں میں وہی رونق لوٹے گی اور زندگی معمول کی طرح گزرے گی۔ ہم اوپر والے سے دعا کرتے ہیں کہ اس کورونا وبا کو خدا جلد سے جلد ختم کرے۔
