پورے ملک میں کورونا وائرس کی وجہ سے لاک ڈاؤن میں مذہبی مقامات کو بند کیا گیا تھا، لیکن جب سے ان لاک کا سسٹم شروع ہوا ہے، ویسے ویسے مذہبی مقامات کو کھولا جارہا ہے۔
ان لاک-3 کے تحت بارہ بنکی کے دیوا شریف میں حاجی وارث علی شاہؒ کی درگاہ عام زائرین کے لیے کھول دی گئی ہے۔ یہاں کووڈ-19 کے پیش نظر جاری کی گئی گائیڈلائن کے مطابق زیارت کرائی جا رہی ہے۔ مزار کے باہر سے ہی بغیر شیرینی کے زائرین ضروری رسوم ادا کر سکتے ہیں۔
دیوا میں درگاہ کی وجہ سے تجارت بھی خوب ہوتی تھی لیکن زائرین کے کم آنے سے تاجر بھی پریشان ہیں۔ دوسری جانب زائرین کو یہاں سب کچھ بدلا بدلا سا محسوس ہو رہا ہے، جس کی وجہ سے وہ کافی پریشان ہیں۔ فی الحال زائرین کی تعداد کورونا دور میں زیادہ نہیں ہے، جس کے سبب ابھی بھی تاجر طبقہ گاہک کا منتظر ہے۔
غور طلب ہے کہ دیوا شریف میں حاجی وارث علی شاہ کی درگاہ پر دور دراز سے عوام زیارت کرنے آتی ہے۔ لاک ڈاؤن میں یہ درگاہ متعدد ماہ تک بند رہی۔ اب یہاں جاری گائیڈلائن کے مطابق زائرین کو اندر جانے دیا جا رہا ہے۔
درگاہ کے احاطے میں سماجی فاصلے کا خاص خیال رکھا جا رہا ہے، ایک وقت میں کچھ ہی زائرین کو داخلہ کی اجازت ہے۔ زائرین کو مزار تک جانے کی اجازت نہیں ہے۔ وہ برآمدے سے سلام اور بوسہ دے سکتے ہیں۔ اس کے علاوہ مزار پر شیرینی وغیرہ لے جانے کی بھی اجازت نہیں ہے۔
