مظفرنگر: کورونا ویکسین کی دوسری خوراک دینے کا مطالبہ

ادیوگ ویاپار منڈل کے تاجروں نے میمورنڈم کے ذریعہ ضلع مجسٹریٹ سے کووڈ-19 ویکسین کی دوسری خوراک دینے کا مطالبہ کیا ہے۔

اترپردیش کے ضلع مظفر نگر میں ادیوگ ویاپار منڈل اترپردیش کے درجنوں تاجروں نے آج ضلع کلکٹر کو ایک میمورنڈم پیش کیا،
جس میں تاجروں نے ضلع مجسٹریٹ سے کووڈ-19 کی دوسری خوراک دینے کا مطالبہ کیا ہے۔

اس دوران تاجروں نے بتایا کہ کورونا کی ٹیکہ کاری کے تحت جن افراد کو کووڈ ویکسین کی پہلی خوراک دے دی گئی ہے انہیں اب دوسری خوراک دینے کا وقت آگیا ہے، لیکن اسپتالوں میں ویکسین نہیں ہونے کی وجہ سے دوسری خوراک نہیں دی جا رہی ہے۔


تاجروں نے صحافیوں سے بات کرتے ہوئے کہا کہ کورونا وبا میں ہو رہے اضافے کو روکنے کے لیے حکومت 45 سال سے زائد عمر کے لوگوں کو ڈور ٹو ڈور ویکسینیشن کرائے، تاکہ سینکڑوں لوگوں کے رابطے میں آنے والے تاجر طبقہ کو اس بیماری سے بچایا جا سکے۔