دہلی پولیس نے خیر سگالی میں کسانوں کو پھول اور ماسک تقسیم کئے

نوئیڈا اور چلہ بارڈر پر کسان احتجاج اور دھرنے پر بیٹھے ہوئے ہیں۔ دہلی اور نوئیڈا پولیس کا کسانوں سے مذاکرات کا عمل بھی جاری ہے تا کہ جن سڑکوں کو بلاک کیا گیا ہے اسے کھول دیا جائے۔

اسی مذاکرات کا نتیجہ ہے کہ بطور خیرسگالی کسانوں نے کل دہلی کے اکشر دھام مندر کی جانب سے نوئیڈا سیکٹر 14 آنے والی سڑک کو آمد و رفت کے لئے کھول دیا تھا، جس سے یقیناً لوگوں کو بہت بڑی راحت ملی ہے۔

دہلی پولیس نے بھی آج نوئیڈا دہلی کی سرحد پر بیٹھے کسانوں کو پھول اور ماسک تقسیم کر کے خیر سگالی کا مظاہرہ کیا۔

دہلی پولیس نے بھارتیہ کسان یونین کے صدر بھانو پرتاپ سنگھ کو بھی سفید پھول پیش کیے۔ جو امن اور بھائی چارے کی علامت ہے، لیکن کسانوں کا کہنا ہے کہ وہ اپنے ہدف سے بھٹکنے والے نہیں ہیں۔

غورطلب ہے کہ نئے زرعی قوانین کے خلاف کسانوں کا احتجاج آج 15واں روز ہے۔ کسان رہنماؤں نے حکومت کی تجویز سے انکار کر دیا ہے۔

کسانوں نے فیصلہ کیا ہے کہ وہ اس قانون کی مخالفت میں سنیچر کے روز جئے پور - دہلی اور دہلی - آگرہ ایکسپریس وے بند کریں گے اور احتجاج میں شدت لاتے ہوئے 14 دسمبر کو ملک گیر مظاہرہ کریں گے۔