بریلی کی معروف درگاہ شاہ دانہ ولی کو خالی کرایا گیا

اترپردیش کے ضلع بریلی میں واقع درگاہ شاہ دانہ ولی سرکار سے تقریباً 200 زائرین کو درگاہ کے احاطے سے باہر نکال کر اُن کے گھروں کو واپس بھیج دیا گیا ہے۔

اہم بات یہ ہے کہ یہ زائرین ملک میں لاک ڈاؤن کے اعلان سے قبل یہاں قیام پ‍‍‍‍ذیر تھے۔

درگاہ کے متولّی عبد الواجد خان نوری نے گزشتہ 25 مارچ کو تھانہ بارہ دری پولس کو اطلاع دے کر درگاہ کے احاطے کو خالی کرانے کی گزارش کی تھی تاہم پولس نے اُس دن توجہ نہیں دی۔

محض زبانی طور پر صرف اتنا کہا کہ یہ تمام زائرین اور دیگر لوگ لاک ڈاؤن سے قبل یہاں موجود ہیں، لہذا اِن کے یہاں قیام کرنے میں کوئی حرج نہیں ہے۔

بعد ازاں پولیس نے درگاہ شاہ دانہ ولی سرکار کے احاطے کو زبردستی خالی کرایا اور تمام زائرین مع اہل خانہ کو گھر بھیج دیا گیا۔

اس کے علاوہ اُنہیں تاکید کی گئی ہے کہ یہ لوگ گھروں میں خود کو آئسولیٹ کر لیں اور باہر نہ نکلیں۔

کورونا وائرس کو ایک خاص طبقہ سے منسلک کرنے کی کوشش کے تحت مساجد، درگاہوں اور خانقاہوں پر ضلع انتظامیہ اور پولس نے سختی شروع کر دی ہے۔