Tantrik Held While Taking Dead Body تانترک نومولود کی لاش قبر سے نکالتے ہوئے پکڑا گیا، لوگوں نے جم کر پٹائی کی

اتر پردیش کے سنبھل میں ایک تانترک نومولود کی لاش کو قبر سے نکال رہا تھا۔ اسی دوران گاؤں کے لوگ وہاں پہنچ گئے اور تانترک کی پٹائی کر دی۔ Tantrik caught in Sambhal UP

سنبھل: اترپردیش کے سنبھل میں واقع اسمولی تھانہ علاقے کے شہباز پور کلاں گاؤں میں اتوار کی صبح ایک نوجوان ایک نومولود کی لاش کو قبر سے نکال رہا تھا۔ اسی دوران گاؤں کے لوگ وہاں پہنچ گئے۔ گاؤں کے لوگوں نے اس شخص کو پکڑ کر بری طرح پیٹا۔ بتایا جا رہا ہے کہ اعظم نام کا ملزم جھاڑ پھونک اور تنتر منتر کے لیے نومولود بچے کی لاش کو باہر لے جا رہا تھا۔ اطلاع ملنے پر پولیس موقعے پر پہنچ گئی اور ملزم نوجوان کو گرفتار کر لیا۔ ملزم تانترک کو عدالت میں پیش کیا گیا۔ اس کے بعد اسے جیل بھیج دیا گیا۔

گاؤں شہباز پور کلاں کے لوگوں کا کہنا ہے کہ اس سے قبل بھی قبروں سے لاشیں چوری ہونے کے واقعات پیش آچکے ہیں۔ اسی لیے اس بار گاؤں کے لوگ لاش چوری کرنے والے شخص کی تلاش میں تھے۔ شہباز پور کلاں گاؤں کے رہنے والے بلال کے بیٹے اختر حسین کی اہلیہ عاصمین نے جمعہ کی رات ایک بچے کو جنم دیا۔ جب نومولود کی طبیعت خراب ہونے لگی تو گھر والے اسے علاج کے لیے گاؤں لے گئے جہاں نومولود وہیں دم توڑ گیا۔ اس نومولود کو ہفتہ کی صبح گاؤں شہباز پور کلاں کے قبرستان میں سپرد خاک کر دیا گیا۔

بلال نے بتایا کہ اس کا بڑا بھائی محمد یوسف اتوار کو نومولود کی قبر پر پہنچا جہاں وہ صبح فجر کی نماز کے بعد فاتحہ پڑھنے آیا تھا۔ وہاں اس نے گاؤں کے ایک نوجوان کو بچے کی لاش قبر سے نکالتے ہوئے پکڑ لیا۔ شور مچانے پر آس پاس کے لوگ بھی وہاں پہنچ گئے۔ سب نے مل کر ملزم کی جم کر پٹائی کر دی، بعد ازاں اسے پولیس کے حوالے کر دیا۔

بلال نے بتایا کہ ملزم جھاڑ پھونک اور تنتر منتر کا کام کرتا تھا۔ وہ صرف تنتر منتر کی خاطر قبرستان سے نومولود کی لاش نکال رہا تھا۔ موقعے پر پہنچے گاؤں والوں نے پہلے اس کی شدید پٹائی کی اور پھر اسے پولیس کے حوالے کر دیا۔ پولیس نے بلال کی شکایت پر ایف آئی آر درج کرکے قانونی کارروائی مکمل کرنے کے بعد ملزم کو جیل بھیج دیا۔