بارہ بنکی: بہترین آواز کے مالک محمد شکیل کو نہیں مل سکی پہچان

محمد شکیل موجودہ دور میں جدید ٹیکنالوجی اور عالمی وبا کی وجہ سے کافی خسارے میں ہیں۔ آہستہ آہستہ آرکسٹرا کا کام ختم ہورہا ہے اور عالمی وبا میں بھی کام ملنا مشکل ہورہا ہے۔ محمد شکیل کی جو شناخت ملنا چاہیے تھی وہ حاصل نہیں ہوسکی۔

ریاست اترپردیش کے ضلع بارہ بنکی سے تعلق رکھنے والے گلوکار محمد شکیل تقریباً 25 برس سے محمد رفیع، محمد عزیز اور شبیر صاحب کے فلمی نغمے گارہے ہیں، لیکن گھریلو مسائل کی وجہ سے وہ اعلیٰ مقام حاصل نہیں کرسکے۔

ضلع کے گلریا گاردا کے رہنے والے محمد شکیل پھل کے کاروبار سے وابستہ ہیں۔ ان کے گھر کا خرچ اسی سے چلتا ہے۔ گلوکاری ان کا شوق ہے۔ وہ 12 برس کی عمر سے گانا گارہے ہیں۔ پہلے وہ نوحہ خوانی کرتے تھے، بعد میں رفتہ رفتہ وہ فلمی گانے گاکر آرکسٹرا ٹیم کا حصہ بن گئے۔

محمد شکیل نے گلوکاری کی کوئی تربیت یا تعلیم حاصل نہیں کی۔ محمد رفیع، محمد عزیز اور شبیر سمیت تمام گلوکاروں کے وہ نغمے انہی کی آواز میں گاتے ہیں۔ وہ اپنی شادی سے قبل ممبئی میں بھی اپنی قسمت آزمانے گئے، لیکن شادی کے بعد گھریلو مسائل میں پھنس کر رہ گئے۔ اب وہ بارہ بنکی اور اطراف کے اضلاع میں گلوکاری کرتے ہیں۔ ان کی آواز اور ہنر کے لوگ قائل ہیں اور انہیں باہر نکلنے کا مشورہ بھی دیتے ہیں۔

محمد شکیل موجودہ دور میں جدید ٹیکنالوجی اور عالمی وبا کی وجہ سے کافی خسارے میں ہیں۔ آہستہ آہستہ آرکسٹرا کا کام ختم ہورہا ہے اور عالمی وبا میں بھی کام ملنا مشکل ہورہا ہے۔ محمد شکیل کی جو شناخت ہونی چاہیے تھی وہ حاصل نہیں ہوسکی۔