بارہ بنکی میں شعری نشست کا انعقاد

ریاست اتر پردیش کے ضلع بارہ بنکی میں کووڈ۔19 کی دوسری لہر کے باعث بند پڑی سرگرمیاں اب بحال ہونے لگی ہیں۔ اسی کے پیش نظر سنیچر کی شب ادبی تنظیم کونسل فار سوشل ایڈوانسمنٹ کی جانب سے ایک شعری نشست کا اہتمام کیا گیا۔ شعری نشست میں عزم شاکری اور رام پرکاش بیخود جیسے شعراء کرام نے شرکت کی۔

شہر کے نیو پلےوے اسکول میں ہوئی اس نشست میں عام آدمی پارٹی کے سینئر رہنما سنجے سنگھ نے بطور مہمان خصوصی شرکت کی۔

نشست کے آغاز سے قبل سوسائٹی کی جانب سے ان کو شال پہناکر استقبال کیا گیا۔

اس موقع پر سنجے سنگھ نے محفل سے خطاب کیا۔ انہوں نے کہا کہ آج کے دور میں جب سماج میں تفریق پیدا کرنے کی کوشش ہو رہی ہے۔ ایسے میں شعراء کرام جوڑنے کی بات کرتے ہیں، جو قابل ستائش ہے۔

اس کے بعد نشست میں شعر و شاعری کا دور شروع ہوا۔ جس میں فیض خمار بارہ بنکوی، وقار بارہ بنکوی، فضیل لالپوری، محمد سلیم، عثمان مینائی، رام پرکاش بیخود اور عزم شاکری نے اپنے کلام سے ناظرین کا دل جیت لیا۔

نشست میں سابق ریاستی وزیر اروند سنگھ گوپ نے بھی شرکت کی۔ نشست میں نظامت کے فرائض کو فضل انعام مدنی نے انجام دیا۔