بارہ بنکی: راہل کے ساتھ بدسلوکی سے کانگریس کارکنان برہم

ریاست اترپردیش کے ضلع بارہ بنکی میں کانگریس کے سابق صدر راہل گاندھی کی گرفتاری اور ان کے ساتھ ہوئی بدسلوکی کے خلاف کانگریس کارکنان نے احتجاج کیا اور جم کر حکومت کے خلاف نعرے بازی کی۔ اس دوران پولیس نے مظاہرین کو حراست میں لے لیا۔

ریاست اترپردیش میں ہاتھرس جنسی زیادتی اور قتل کے بعد ان کے اہل خانہ سے ملنے جارہے کانگریس کے سابق صدر راہل گاندھی کی گرفتاری اور ان کے ساتھ ہوئی بدسلوکی کی وجہ سے ریاست اتر پردیش کے بارہ بنکی کے کانگریس کارکنان میں برہمی پائی جاتی ہے۔ کانگریس کارکنان نے شہر کے سب سے زیادہ بھیڑ بھاڑ والے علاقے سترکھ ناکے پر سڑک جام کر دی۔ اس دوران پولیس اور کانگریس کارکنان کے درمیان جم کر نوک جھونک ہوئی۔

بتا دیں کہ راہل گاندھی کے ساتھ پولیس کی بدسلوکی کی خبر ملک بھر میں آگ کی طرح پھیلی ہے۔ اس کے بعد ریاست اترپردیش میں کانگریس کے ریاستی ترجمان تنج پنیا کی قیادت میں تقریبا دو درجن کانگریس کارکنان نے سترکھ ناکہ چوراہے پر جام لگا دیا۔

کانگریس کارکنان کا احتجاج سڑک پر آدھے گھنٹے سے زیادہ وقت تک چلتا رہا۔ موقع پر موجود پولیس تماشہ بین بنی رہی۔

بارہ بنکی میں راہل کے ساتھ بدسلوکی سے کانگریس کارکنان برہم

بعد میں کوتوال کے موقع پر پہنچنے پر انہوں نے کانگریسیوں سے سڑک خالی کرانے کی کوشش کی۔ اس دوران ان کی کانگریس کارکنان سے نوک جھوک ہوئی۔

کافی مشقت کے بعد پولیس کانگریس کارکنان کو بغل کے امبیڈکر پارک لے جا سکی۔ کھینچ تان میں کوتوال پنکج سنگھ کی طبیعت بھی بگڑ گئی۔ بعد میں کانگریس کارکنان کو گرفتار کرلیا گیا۔