مرادآباد: ضلع پنچایت انتخابات کے لیے کانگریس کمر بستہ

اترپردیش کے ضلع مرادآباد میں جگر ہائٹ سیول لائن میں کانگریس پارٹی کے کارکنان نے پارٹی کے سینئر رہنما مغیث جیلانی کا استقبال کیا۔ اس دوران پارٹی نے ایک میٹنگ کا انعقاد کیا جس میں پنچایت انتخابات کے تعلق سے پارٹی کی جانب سے تیاری کی گئی۔

کانگریس کے رہنما مغیث جیلانی نے کہا کہ کانگریس پارٹی حق اطلاعات قانون کے ذریعہ عوام کی پریشانیوں کا حل نکالے گی اور سرکاری محکموں میں ہو رہی بدعنوانی کا خلاصہ کرے گی۔

کانگریس کے ضلع صدر ونود گمبر نے بتایا کہ کانگریس ضلع پنچایت کے الیکشن میں اپنی پوری طاقت اور محنت کے ساتھ ضلع کے 39 وارڈوں میں الیکشن لڑے گی جس کی تیاری کے لیے بدھ کے دن ضلع پنچایت انچارج راشد علوی تشریف لائیں گے۔

ساتھ ہی انہوں نے کہا کہ پارٹی 45 سال بعد ضلع پنچایت کے الیکشن اب پوری طاقت سے لڑنے جا رہی ہے جس میں انہوں نے سبھی وارڈوں پر جیتنے کا دعویٰ کیا ہے۔

بی جے پی کی مخالفت کرتے ہوئے کہا کہ بی جے پی کی پول کھل گئی ہے۔ اس کے جھوٹے وعدے عوام کی سمجھ میں آ گئے ہیں، اب عوام ان کے بہکاوے میں نہیں آئیں گے۔ عوام کو ایسی حکومت کی ضرورت ہے جو ہر مذہب و ملت اور قوم کو ساتھ لے کر چلے۔

انہوں نے کہا کہ تفرقہ پھیلانے والی حکومت سے عوام کا دل بھر گیا ہے اور ترقی کی راہ پر گامزن کرنے والی حکومت چاہتی ہے۔