میرٹھ: اندراگاندھی کے مجسمے کو نقصان پہنچانے پر کانگریس کا احتجاج

ضلع کانگریس نے سابق وزیراعظم اندرا گاندھی کے مجسمے کو نقصان پہنچانے والے شرپسند عناصر کے خلاف سخت کارروائی کا مطالبہ کیا اور اندرا گاندھی کے نئے مجسمے کو نصب کرنے کا مطالبہ کیا۔

ریاست اترپردیش کے ضلع میرٹھ میں شاستری نگر علاقے میں نصب ملک کی سابق وزیر اعظم اندرا گاندھی کے مجسمے کو مسمار کرنے کا واقعہ پیش آیا۔ شرپسند عناصر کے اقدام سے ناراض کانگریس رہنما اور کارکنان نے میرٹھ ڈی ایم افس کے باہر احتجاجی مظاہرہ کیا۔ اس موقع پر انہوں نے مجسمے کو نقصان پہنچانے والے شرارتی افراد کے خلاف سخت کارروائی کا مطالبہ کیا اور اندرا گاندھی کے نئے مجسمے کو نصب کرنے کا مطالبہ کیا۔

اس موقع پر کانگریس رہنما زاہد نے بی جےپی پر بالواسطہ تنقید کرتے ہوئے کہا کہ اس بات کو خاص طور پر بتانے کی ضرورت نہیں ہے کہ یہ کام کس نے کیا ہے تاہم 'ہم امن پسند لوگ ہیں اور ہم شرپسندوں کی کوششوں کو ناکام کریں گے'