کانگریس کا بی جے پی کے خلاف بڑے پیمانے پر احتجاج

ریاست اترپردیش کے دارالحکومت لکھنؤ میں کانگریس کارکنان نے بی جے پی دفتر کا گھیراؤ کرنے کی پوری کوشش کی، لیکن پولیس فورسز نے انہیں روک کر جیل بھیج دیا۔

واضح رہے کہ اناؤ گینگ ریپ متاثرہ کی کار گروبخش گنج علاقے میں حادثے کا شکار ہوگئی تھی، کار میں سوار تین افراد کی موت ہوگئی جبکہ متاثرہ اور اس کے وکیل زندگی اور موت کی لڑائی لڑ رہے ہیں۔

ریاست میں خواتین کے خلاف بڑھتے جنسی جرائم کے معاملے پر کانگریس کارکنان نے آج لکھنؤ میں احتجاج کیا۔ وہ بی جے پی کے دفتر کا گھیراؤ کرنے جا رہے تھے، لیکن راستے ہی میں پولیس فورسز نے انہیں زبردستی پکڑ کر جیل بھیج دیا۔

سابق رکن پارلیمان راکیش سچان نے ای ٹی وی بھارت سے بات چیت کے دوران کہا کہ یوگی حکومت خواتین کے خلاف ہے، جب کہ صرف نام کے لیے وہ کہتی ہے کہ ہم خواتین کے حقوق کے لیے کام کرتے ہیں، سچائی اس کے برعکس ہے۔

اتر پردیش کانگریس پارٹی کے ترجمان سیف علی نقوی نے کہا کہ ہم چاہتے ہیں کہ متاثرہ کو انصاف ملے اور ان کا علاج بھی دہلی میں کرایا جائے، صوبہ کی بی جے پی حکومت کی تاناشاہی ہے۔

کانگریس پارٹی کے سینئر رہنما نے کہا کہ ہمارا مقصد یہ ہے کہ متاثرہ خاتون کو انصاف ملے حکومت خواتین کے حقوق کی بات کرتی ہے لیکن ہر معاملے میں وہ ناکام ہے ۔

انائو گینگ ریپ متاثرہ کے سڑک حادثہ کے بعد ریاست میں ہی نہیں بلکہ پورے بھارت میں سیاست تیز ہو گئی ہے۔ یہی وجہ ہے کہ سبھی اپوزیشن پارٹیوں نے بی جے پی کے خلاف مورچہ کھول دیا ہے۔