ای ٹی وی بھارت سے بات چیت کے دوران یوپی کانگریس کمیٹی کے صدر اجے کمار للو نے کہا کہ 'اترپردیش کے وزیر اعلیٰ یوگی آدتیہ ناتھ نے جو بجٹ پیش کیا ہے وہ مایوس کن ہے۔'
انہوں نے کہا کہ 'بجٹ سے کسانوں، نوجوانوں، غریبوں اور دلت طبقات کو کوئی فائدہ نہیں ہے کیونکہ انہیں پوری طرح نظر انداز کیا گیا ہے۔'
اجے کمار للو نے کہا کہ 'ریاست کے کاشتکار آوارہ جانوروں سے پریشان ہے لیکن حکومت نے بجٹ میں اس کے لیے کوئی بات نہیں کی۔ سرکار ایک طرف کسانوں کی آمدنی دگنا کرنے کی بات کرتی ہے لیکن وہ کیسے کرے گی؟ اس کا ذکر نہیں کرتی۔'
کانگریسی لیڈر نے کہا کہ اترپردیش میں ہر تین گھنٹے میں ایک نوجوان بیروزگاری کی وجہ سے خودکشی کرتا ہے، لیکن بجٹ میں نوجوانوں کو نظر انداز کیا گیا۔
دلت پچھڑے طبقے کے طلباء کو جو وظیفہ ملتا تھا، اس میں بھی کمی کر دی گئی۔'نوودے اسکول' میں زیر تعلیم اور وہاں رہنے والے طلباء کو اب زیادہ فیس ادا کرنی ہوگی۔
اس کے علاوہ مدرسہ جدیدکاری اساتذہ، آنگن باڑی، ہوم گارڈ وغیرہ کی تنخواہ نہیں دی جا رہی، لیکن اس بجٹ میں انہیں بھی کچھ خاص نہیں حاصل ہوا۔
اترپردیش کانگریس کمیٹی کے صدر اجے کمار للو نے کہا کہ ہم اس کے خلاف سڑک سے لے کر اسمبلی تک سوال اٹھانے کا کام کریں گے۔
