مرادآباد: کسانوں کے احتجاج میں کانگریس پارٹی شامل

ریاست اتر پردیش کے شہر مرادآباد کے مشاعرہ گراؤنڈ میں بھارتیہ کسان یونین کی غیر معینہ مدت کے لیے جاری ہڑتال میں کانگریس پارٹی کے کارکنان نے بھی شرکت کی۔

احتجاج کر رہے کسانوں کا مطالبہ ہے کہ مرکزی حکومت کوکسانوں کی پیداوار یعنی اناج کی قیمت طے کرنے کا حق نہیں ہے۔

انھوں نے مرکزی حکومت سے مطالبہ کیا ہے کہ کسانوں کے خلاف جو قانون حکومت نے پاس کیا ہے اس کو واپس لیا جائے۔

بھارتیہ کسان یونین کے کارکنوں نے کہا کہ حکومت کو ڈاکٹر سوامی ناتھن رپورٹ کو عملی جامہ پہنانا چاہیے تھا لیکن حکومت نے ایسا نہیں کیا۔

وہیں کانگریس پارٹی کے ضلعی صدر ونود گمبر نے کہا کہ وہ کسانوں کے ساتھ ہیں اور ان کی لڑائی میں برابر کے شریک رہیں گے۔

انھوں نے مزید کہا کہ کسان کھیتوں پر کام کرتے ہیں، ملک کی سر حدوں پر جوان حفاظت کرتے ہیں، تبھی تو ”جے جوان جے کسان” کا نعرہ دیا گیا ہے۔

انھوں نے کہا کہ کسان بچے گا تو ملک چلے گا۔