Congress Minority Cell میرٹھ میں کانگریس کی جے جواہر جے بھیم مہم

میرٹھ میں کانگریس اقلیتی سیل کی جانب سے چلائی جا رہی مہم جے جواہر اور جے بھیم مہم کے تحت پارٹی نے دلتوں اور مسلمانوں سے رابطہ قائم کرنے کی کوشش تیز کردی ہے۔

میرٹھ:ریاست اتر پردیش کے ضلع میرٹھ میں کانگریس اقلیتی سیل کی جانب سے جے جواہر اور جے بھیم کے عنوان سے مہم کا آغاز کیا گیا ہے۔ اس مہم کے تحت کانگریس 07 اگست سے 13 اگست تک پوری ریاست میں مسلمانوں اور دلت سماج کے لوگوں کے گھر جاکر رابطہ قائم کرے گی۔

کانگریس اقلیتی سل کے ریاستی نائب صدر اور ترجمان ڈاکٹر خالد محمد خان نے جانکاری دیتے ہوئے کہا کہ جے جواہر اور جے بھیم کے ذریعے ہم دلتوں اور مسلمانوں سے رابطہ کریں گے۔ اس کے لیے کانگریس کارکنان دلت بستیوں میں جائیں گے۔ ریاست کے ہر ضلع میں روزانہ 100 دلت خاندانوں سے رابطہ کرکے ہم پانچ لاکھ 52 ہزار خاندانوں کو جوڑنے کا ہدف ہے۔ قریب دس لاکھ دلتوں کے درمیان کتابچے تقسیم کرکے انہیں بیدار کیا جائے گا۔ کیونکہ مودی حکومت میں دلت اور مسلمان نشانے پر ہیں۔ شاید ہی کسی تھانے میں دلت ایکٹ کے تحت مقدمہ درج ہو۔

دوسری طرف کانگریس کی طرف سے بنائے گئے قانون کو یوگی حکومت نے ختم کر دیا ہے جس میں دلتوں کی زمین غیر دلتوں کو خریدنے پر پابندی تھی۔ اب کوئی بھی دلت کو دھمکی دے کر زمین خرید سکتا ہے۔ دلت سماج کی تذلیل کرنے پر گیتا پریس کو انعام دیا گیا۔اس نے بابا صاحب پر ذات پات کے تبصرے والے مضامین شائع کیے تھے۔

انہوں نے مزید کہا کہ قانونی مساوات لانے کے نام پر یکساں سول کوڈ کے بہانے مستقبل میں ریزرویشن ختم کرنے کا راستہ کھولا جا رہا ہے۔ کیونکہ ریزرویشن بھی ایک خاص حق ہے جو صرف دلت اور پسماندہ لوگوں کو سماجی بنیادوں پر ملا ہے۔ یعنی کانگریس کی کمزوری کی وجہ سے دلت مسلمانوں کے آئینی حقوق خطرے میں پڑ گئے ہیں۔