مظالم کو شہ دینے والوں کو خواتین شکست دیں گی: پرینکا

کانگریس جنرل سکریٹری پرینکا گاندھی واڈرا نے اترپردیش کی یوگی حکومت کو ہدف تنقید بناتے ہوئے کہا ہے کہ جمہوریت کی کردار کشی کرنے والے کان کھول کر سن لیں کہ خواتین پردھان، بلاک پرمکھ، ایم ایل اے، ایم پی، وزیر اعلیٰ، وزیر اعظم بنیں گی اور ان پر مظالم ڈھانے والوں کو شہ دینے والی حکومت کو شکست دیں گی۔

یوپی کے تین روزہ دورے کے دوسرے دن ہفتہ کو پرینکا واڈرا نے لکھنؤ سے بذریعہ سڑک لکھیم پوری کھیری مین پنسگواں بلاک کے سیمرا گھاٹ پہنچی اور بلاک پرمکھ انتخاب میں نامزدگی کے دوران تشدد و ہراسانی کی شکار خواتین سے ملاقات کی۔

اس موقع پر پارٹی کے صدر اجے کمار للو، نیشنل سکریٹری دھیرج گرجر، آرادھنا مشرا مونا، دیپک سنگھ سمیت دیگر لیڈر موجود تھے۔

کانگریس جنرل سکریٹری نے کہا کہ ریتو سنگھ اور انیتا یادو پر بی جے پی کے غنڈوں نے حملہ کیا۔ انہوں نے کہا کہ جمہوریت کی کردار کشی کرنے والی بی جے پی غنڈے کان کھول کر سن لیں خواتین پردھان، بلاکھ پرمکھ، ایم ایل اے، ایم، وزیر اعلیٰ، وزیراعظم بنیں گی اور ان پر ظلم کرنے والوں کو شہ دینے والی حکومت کو شکست دیں گی۔

انہوں نے کہا کہ پنچایت انتخابات میں بی جے پی کے ذریعہ کئے گئے تشدد کی شکار اپنی سبھی بہنوں، شہریوں کے انصاف کے لئے میں ریاستی الیکشن کمیشن کو خط لکھوں گی۔

قابل ذکر ہے اترپردیش میں اگلے سال ہونے والے اسمبلی انتخاب کی تیاریوں کا جائزہ اور کارکنوں میں جوش بھرنے کے ارادے سے پرینکا واڈرا جمعہ کو تین روزہ دورے پر لکھنؤ پہنچی تھیں۔ ایئر پورٹ سے وہ حضرت گنج علاقے واقع گاندھی پرتما پہنچی اور پنچایت انتخاب میں گھپلہ اور خراب نظم ونسق کا حوالے دیتے ہوئے خاموش رہ کر احتجاج کیا۔

حضرت گنج پولیس نے کووڈ پرٹوکول کا حوالہ دیتے ہوئے ان سے دھرنا ختم کرانے کی اپیل کی جس پر انہیں کاغذ پر لکھ کر دیا کہ پنچایت انتخاب کے وقت بھی کورونا تھا۔ پولیس نے اس سلسلے میں پرینکا واڈرا سمیت پانچ لیڈروں کے خلاف حضرت گنج کوتوالی میں ایف آئی آر درج کرائی ہے۔ سکریٹریٹ چوکی انچارج کے ذریعہ درج کرائی گئی ایف آئی آر میں وبائی ایکٹ کی خلاف ورزی کا الزام لگایا گیا ہے۔

یواین آئی