بریلی: اسکول فیس میں چھوٹ کا مطالبہ

بریلی میں ضلع کانگریس کمیٹی نے کورونا وائرس کی وجہ سے معاشی بحران کا سامنا کرنے والے متوسط طبقے، کسانوں، وکلاء اور والدین کو معاشی امداد کی فراہمی کا مطالبہ کیا ہے۔

کانگریس کے ضلع صدر کی سربراہی میں ایک وفد آج ضلع کلیکٹریٹ پہنچا۔ یہاں انہوں نے حکومت کی پالیسیوں کے خلاف احتجاج کرتے ہوئے کہا کہ، 'حکومت کورونا وائرس کی وبا میں کاروبار کی تباہی کے پیش نظر عام لوگوں کو سہولیات فراہم کرائے۔'

کانگریس کمیٹی کے ضلع صدر اشفاق ثقلینی بریلی ڈسٹرکٹ ہیڈ کوارٹر پہنچے اور اُنہوں نے گورنر کو خطاب ایک میمورنڈم اعلیٰ افسران کے سپرد کیا۔

جس میں انہوں نے کہا کہ، 'گذشتہ چار مہینوں سے عالمی سطح پر وباء کووڈ 19 کی وجہ سے روزگار بری طرح متاثر ہوا ہے۔ متوسط طبقہ کے لاکھوں نوجوان بے روزگار ہوچکے ہیں۔

حکومت ان بے روزگاروں کو روزگار فراہم کرنے میں سنجیدگی کا مظاہرہ نہیں کررہی ہے۔ متوسط طبقے کے والدین معاشی طور پر اس قدر پسماندہ ہیں کہ وہ اپنے بچوں کو فیس جمع کرنے سے بھی قاصر ہیں۔

یوپی بورڈ، سی بی ایس ای اور آئی سی ایس ای بورڈ کے پیشِ نظر اترپردیش حکومت کو ٹھوس پالیسی بنا کر کم از کم چار ماہ کی فیس معاف کرنی چاہئے۔

ایسے بھی واقعات پیش آ رہے ہیں کہ کسی بورڈ سے منسلک اور غیر منسلک اسکولوں کے انتظامیہ نے اسکول میں کام کرنے والے پرائیویٹ ملازمین اور پڑائیویٹ ٹیچرس کی تنخواہ نہیں دی ہے۔

حکومت ایسے پریشان ٹیچرس اور ملازمین کو ہر ماہ کم از کم آٹھ ہزار روپے فی ماہ کے حساب سے چار ماہ مالی امداد فراہم کرے۔

کانگریس ضلع صدر نے نیز نصاب اور اسکول کی ڈریس میں کوئی تبدیلی نہیں کیے جانے کا بھی مطالبہ کیا۔

اسکول فیس میں چھوٹ کا مطالبہ

اکثر کووڈ 19 کے مریض ملنے سے عدالتوں میں چھٹّی کا اعلان کیا جا رہا ہے۔ ایسے میں ظاہر ہے کہ وکلاء کی آمدنی بری طرح متاثر ہوئی ہے۔

بار ایسوسی ایشن میں اندراج شدہ وکلاء کو بھی اترپردیش حکومت کو دس ہزار روپے ماہانہ کی مالی مدد فراہم کرنی چاہیئے۔

متوسط طبقے کے کنبے اور کسان، جن کی سالانہ آمدنی دو لاکھ روپے سے کم ہے اور جنہیں نہ تو ”پردھان منتری کسان سمّان نیدھی منصوبہ“ اور نہ ہی حکومت کی کسی دیگر پنشن کا فائدہ ملتا ہے۔

ایسے متوسط طبقے کے غریب لوگوں نے بینکوں سے قرض لیا ہے۔ ان کی چار ماہ کی قسط معافی یا منریگا مزدوروں کے برابر بیس ہزار روپیہ تک کی رقم معاف کی جائے۔'