ٹیکہ کاری کرنے والے مبارکباد کے مستحق: بلدیو سنگھ اولکھ

وزیر مملکت بلدیو سنگھ اولکھ نے آج رامپور کے ضلع ہسپتال میں کورونا ویکسین لگوائی اور کہا کہ میں وزیراعظم اور وزیر اعلیٰ کا شکریہ ادا کرنا چاہتا ہوں جن کی کوششوں کے بدولت یہ ویکسین کو دستیاب ہوئی ہے۔

ریاستی وزیر بلدیو سنگھ اولکھ نے اترپردیش کے شہر رامپور میں واقع ضلع ہسپتال میں آج کورونا کی ویکسین لگوائی۔

اس دوران انہوں نے میڈیا سے گفتگو کرتے ہوئے کہا کہ 'آج میں نے ویکسین لگوائی ہے اس کے لئے میں وزیراعظم اور وزیر اعلیٰ کا شکریہ ادا کرنا چاہتا ہوں کہ ہمارے ملک کے سائنسدانوں کے ذریعہ یہ ویکسین تیار کرائی گئی ہے۔'


وزیر مملکت بلدیو سنگھ اولکھ نے ویکسین لگوانے کے بعد ڈاکٹر کے مشورے کے مطابق آدھے گھنٹے تک آبزرویشن روم میں آرام کیا اور پھر میڈیا کے نمائندوں سے مخاطب ہوکر ان تمام لوگوں کا شکریہ ادا کیا جن کی کوششوں سے یہ ویکسن بھارت میں دستیاب ہوئی۔

انہوں نے کہا کہ ہمارا ملک بھارت پہلا ملک ہوگا جہاں میک ان انڈیا کے تحت دو ویکسن منظر عام پر آئی ہیں۔ ساتھ ہی انہوں نے کہا کہ دنیا کا سب سے بڑا ویکسنیشن پروگرام بھارت میں چل رہا ہے اس کے لئے میں وزیراعظم اور وزیر اعلیٰ کا شکریہ ادا کرنا چاہتا ہوں۔

بلدیو سنگھ اولکھ نے اپنی حکومت کی تعریف کرتے ہوئے کہا کہ 'جس عزم کے ساتھ مرکزی حکومت اور ریاست کی یوگی حکومت نے ملک کے لوگوں کی صحت و سلامتی کے لئے کام کر رہے ہیں یہ ویکسنیشن اس میں ایک میل کا پتھر ثابت ہوگی۔