رامپور شہر اسمبلی حلقہ میں 21 اکتوبر کو ضمنی انتخاب ہونا ہے۔ رکن پارلیمان اعظم خان کی اہلیہ ڈاکٹر تزئین فاطمہ سمیت چار امیدوار انتخابی میدان میں ہیں۔ تمام ہی امیدواروں کی جانب سے انتخابی سرگرمیاں جاری ہیں۔
گذشتہ رات بی جے پی امیدوار بھارت بھوشن گپتا کا ایک انتخابی جلسہ محلہ پیپل والی درگاہ پر تھا۔ ضابطۂ اخلاق کے مطابق رات 10 بجے تک انتخابی جلسوں کی اجازت ہے، جبکہ بھارت بھوشن 10:15 بجے جلسہ گاہ پہنچے اور 10:45 بجے رات تک انہوں نے اپنا جلسہ جاری رکھا۔
ضابطۂ اخلاق کی خلاف ورزی کئے جانے پر گورنمنٹ حامد انٹر کالج کے پرنسپل رمیش چند گنگوار کی تحریر پر پولیس کی اُڑن دستہ ٹیم نے رامپور کے تھانہ گنج میں دفعہ 171سی کے تحت این سی آر نمبر 101/19 درج کیا۔
آپ کو بتا دیں کہ اس ضمنی انتخابات میں رامپور ضابطہ اخلاق کی خلاف ورزی کا یہ پہلا معاملہ سامنے آیا۔ اس سے پہلے عام انتخابات میں سماجوادی رہنما و رکن پارلیمان اعظم خان پر متعدد مقدمے ضابطہ اخلاق کی خلاف ورزی کو لیکر بھی کرائے گئے تھے، وہیں بی جے پی کی لوک سبھا امیدوار سابق رکن پارلیمان جیا پردہ پر بھی دو مقدمے درج ہوئے تھے۔