سہارنپور: بی جے پی رہنما کے خلاف یوگی سے شکایت

حقیقت نگر کے ایک باشندہ نے بی جے پی رکن اسمبلی دیویندر نم کے خلاف شکایت کرتے ہوئے الزام لگایا ہے کہ رکن اسمبلی نے ان کے پلاٹ پر قبضہ کیا ہے۔

ریاست اتر پردیش کے سہارنپور میں حقیقت نگر کے ایک باشندہ نے بی جے پی رکن اسمبلی دیویندر نم کے خلاف شکایت کرتے ہوئے الزام لگایا ہے کہ رکن اسمبلی نے اس کے پلاٹ پر قبضہ کیا ہے۔ دراصل حقیقت نگر کے باشندہ ستیش کمار نے وزیراعلیٰ پورٹل پر بی جے پی کے رکن اسمبلی دیویندر کے خلاف وزیراعلیٰ یوگی کو ایک شکایتی خط بھیجا ہے۔

حقیقت نگر کے زہائشی ستیش کمار نے رکن اسمبلی پر الزام لگایا ہے کہ اس کا دہلی روڈ پر ایک پلاٹ ہے، جس پر بی جے پی رہنما نے قبضہ کر رکھا ہے۔ اس کا کیس ریونیو کورٹ میں بھی چل رہا ہے۔

وہیں اس سلسلہ میں بی جے پی رہنما دیویندر نم نے کہا کہ ستیش کمار کی جانب سے ان کے خلاف کافی عرصے سے جھوٹی شکایات کی جارہی ہیں جب کہ کیس 35 سال پرانا ہے اور ہمارے پاس پلاٹ کے تمام دستاویز موجود ہیں اور فیصلہ بار بار ہمارے حق میں آیا ہے۔

انہوں نے کہا کہ ستیش کمار سیاسی رنجش کے سبب ان کے خلاف اس طرح کی شکایت کررہے ہیں جب کہ معاملہ 35 سال پرانا ہے۔

بی جے پی رہنما نے بتایا کہ نچلی عدالت نے ہمارے حق میں فیصلہ دیا ہے، اب معاملہ ہائی کورٹ میں چل رہا ہے۔ ستیش کمار سیاسی سازش کے تحت انہیں بدنام کررہے ہیں۔ وہیں ستیش کمار کا کہنا ہے کہ ان کے پاس دستاویز موجود ہیں۔ کیس عدالت میں چل رہا ہے۔

واضح رہے کہ دونوں فریق ایک دوسرے پر الزامات عائد کررہے ہیں لیکن دیکھنے والی بات یہ ہوگی کہ یہ فیصلہ ہائی کورٹ سے کس کے حق میں آتا ہے؟