بریلی کے محکمہ صحت کے سینیئر افسر پرغیرقانونی وصولی کا الزام

الزام یہ ہے کہ اے سی ایم او ڈاکٹر اشوک کمار نے خود کو سی ایم او بتاتے ہوئے ایک میڈکل پریکٹشنر کے خلاف ایف آئی آر درج کرانے کی دھمکی دی۔ اور اس سے ناجائز طور پر رقم وصول کرلی۔

ریاست اترپردیش کے شہر بریلی میں محکمہ صحت میں بدعنوانی کا ایک بڑا معاملہ سامنے آیا ہے۔

بریلی کے اے سی ایم او (ایکٹنگ چیف میڈیکل آفیسر) ڈاکٹر اشوک کمار کے اوپر ایک غیر قانونی پریکٹشنر سے پچپن ہزار روہپے وصول کرنے کا الزام ہے۔

ان پر یہ الزام ہے کہ اُنہوں نے دیہی حلقہ میر گنج تحصیل میں بابو رام کے کلینک پر چھاپہ مارا تھا۔ حالانکہ بابو رام غیر قانونی پریکٹشنر ہونے کی وجہ سے کوئی کاغذات نہیں دکھا سکے۔

ڈاکٹر اشوک کمار نے بابو رام کو قانونی کارروائی سے بچانے کے عوض ساٹھ ہزار روپیے کا مطالبہ کیا۔

بابو رام نے سود پر پیسے لیکر دوسرے دن ڈاکٹر اشوک کمار کے ڈرائیور کو پچپن ہزار روپیے دیے۔

بابو رام کو اے سی ایم او ڈاکٹر اشوک کمار کے جانے کے بعد یہ معلومات ہوئی کہ چھاپہ مارنے والے سی ایم او نہیں، بلکہ کوئی اور ہیں اور اُنہیں چھاپہ مارنے کا کوئی حق نہیں ہے۔

اس لیے وہ غیر قانونی وصولی کی شکایت کرنے سی ایم او دفتر آئے تو اُنھوں نے اس شخص کو پہچان لیا، جس نے ان سے پیسے وصول کئے تھے۔

محکمہ صحت پر جب یہ الزام لگایا تو سی ایم او(چیف میڈیکل آفیسر) ڈاکٹر وینیت کمار شکلا نے اس پورے معاملے کی جانچ کا حکم دے دیا ہے۔