بی جے پی اور عظیم اتحاد کے رہنماؤں میں جھڑپیں

ریاست اتر پردیش کے ضلع علی گڑھ تھانہ سول لائن میں آج بی جے پی رہنما اور عظیم اتحاد کے رہنماؤں میں جھڑپیں ہوئیں۔

جمال پور بازار میں آج صبح 11 بجے بی جے پی کے لوگوں نے ستیش گوتم لوک سبھا انتخابات کے امیدوار کی بغیر اجازت کے ریلی نکالی۔

جمال پور کے موجودہ مقامی رہنما صدام حسین کے ساتھ پپو علوی، اسلم نور اور دیگر لوگوں نے بی جے پی کے ریلی نکالتے وقت لوگوں سے پوچھا کہ کیا ان لوگوں نے انتظامیہ سے ریلی کی اجازت طلب کی ہے یا نہیں اس بات پر بی جے پی کارکنان نے ناراضگی ظاہر کرتے ہوئے وہاں موجود رہنماؤں کے ساتھ ہاتھا پائی کی اور ستیش گوتم زندہ باد و بھارت ماتا کی جئے جیسے نعرے لگائے۔

بعد میں جمال پور کی عوام کے ساتھ طلبہ یونین اور ایس پی، بی ایس پی رہنماؤں نے بی جے پی کے لوگوں کو بغیر اجازت کے ریلی نکالنے پر کالے جھنڈے دکھائے۔ کچھ ہی دیر میں پولیس پہنچی اور صدام حسین، پپو علوی اور اسلم نور کو گرفتار کرکے سول لائن تھانے بھیج دیا اور تھوڑی دیر بعد سول لائن تھانے سے ایک گمنام مقام پر انہیں منتقل کردیا۔

مقامی لوگوں کے مطابق بی جے پی کے امیدوار ستیش گوتم کو دوبارہ ٹکٹ ملنے پر علی گڑھ شہر اور گاؤں دیہاتوں میں شدید ناراضگی پائی جارہی ہے۔