اناؤ ریپ معاملہ کے تمام 5 مقدمات دہلی منتقل - Unnao rape case
اناؤ گینگ ریپ کیس میں آج ایک نیا موڑ آگیا جبکہ سپریم کورٹ نے اس سلسلہ میں تمام مقدمات کو اترپردیش سے دہلی منتقل کرنے کا حکم دیا ہے۔
سپریم کورٹ نے آج اس معاملہ میں سخت رخ اپناتے ہوئے تمام پانچ کیس کو سی بی آئی کی اترپردیش عدالت سے دہلی کو منتقل کرنے کا حکم دیا۔
اعلیٰ عدالت نے اس کیس کو حل کرنے کےلیے صرف 45 دن کا وقت دیا ہے۔
چیف جسٹس رنجن گوگوئی کی صدارت والی بنچ نے اناؤ گینگ ریپ کیس کو دہلی منتقل کرتے ہوئے اس کیس پر روزانہ سماعت کرتے ہوئے صرف 45 دنوں میں فیصلہ سنانے کا متعلقہ جج کو حکم دیا ہے۔
اترپردیش حکومت پر بھی ناراضگی کا اظہار کرتے ہوئے سپریم کورٹ نے متاثرہ کو 25 لاکھ روپئے معاوضہ ادا کرنے کا ریاستی حکومت کو حکم دیا۔
رنجن گوگوئی نے کہا کہ ہم نے متاثرہ، ان کے وکیل، متاثرہ کی ماں اور دیگر ارکان خاندان کی سخت سیکوریٹی کےلیے بھی حکم دیا ہے۔
اناؤ گینگ ریپ کیس کی متاثرہ کے سڑک حادثہ کی تحقیقات کو صرف 7 دنوں میں مکمل کرلینے کا بھی عدالت عالیہ نے سی بی آئی کو حکم دیا۔
واضح رہے کہ اترپردیش پولیس نے بی جے پی کے رکن اسمبلی کلدیپ سنگھ سنجر اور دیگر 9 افراد کے خلاف اس سلسلہ میں پہلے سے کیس درج کرتے ہوئے سڑک حادثہ کی مزید تحقیقات کےلیے اس کیس کو سی بی آئی کے حوالہ کردیا ہے۔