اتراکھنڈ کے وزیر اعلیٰ کی یوگی سے ملاقات

اتراکھنڈ کے وزیر اعلٰی پشکر سنگھ دھامی نے جمعرات کو وزیر اعلی یوگی آدتیہ ناتھ سے لکھنؤ میں ان کی رہائش گاہ پر ملاقات کی۔

لکھنؤ: اتراکھنڈ کے وزیر اعلیٰ پشکر سنگھ دھامی نے جمعرات کو وزیر اعلی یوگی آدتیہ ناتھ سے لکھنؤ میں ان کی رہائش گاہ پر ملاقات کی۔

وزیر اعلیٰ کے دفتر کی طرف سے دی گئی معلومات کے مطابق، اس رسمی ملاقات کا مقصد دونوں ریاستوں کے درمیان کچھ اثاثوں کے تعلق سے گزشتہ چند دہائیوں سے جاری باہمی تنازعہ کو حل کرنے کے طریقے تلاش کرنا ہے۔ دھامی نے صبح تقریباً 9.30 بجے وزیر اعلیٰ کی رہائش گاہ پر یوگی سے خیرسگالی پر مبنی ملاقات کی۔

وزیر اعلیٰ کے دفتر کے ایک افسر نے بتایا کہ دھامی اور یوگی کی ملاقات کے بعد جمعرات کو ہی لکھنؤ میں دونوں ریاستوں کے سینئر عہدیداروں کی میٹنگ ہوگی۔ اس میں تنازع کے دائرے والے شناخت شدہ اثاثوں کے متنازعہ پہلوؤں کو باہمی رضامندی سے حل کرنے کے لیے تبادلہ خیال کیاجائے گا۔

قابل ذکر ہے کہ اتراکھنڈ ریاست کی تشکیل کے بعد لکھنؤ اور دہرادون سمیت دونوں ریاستوں میں کچھ شناخت شدہ اثاثوں پر اپنا اپنا دعویٰ ہونے کے سبب تنازعہ جاری تھا۔

یوگی کے وزیر اعلی بننے کے بعد، اتر پردیش حکومت نے تنازعہ کے پہلوؤں کو حل کرنے کی پہل تیز کردی تھی۔ اس کے نتیجے میں دونوں ریاستوں کے درمیان آفیسرز لیول کی بات چیت شروع ہوسکی ہے۔

یواین آئی