مولانا توقیر رضا کے خلاف مقدمہ درج

وزیر اعظم نریندر مودی، وزیر داخلہ امت شاہ اور اترپردیش کے وزیر اعلی یوگی آدتیہ ناتھ کے خلاف متنازع بیان دینے کے الزام میں اتحاد ملت کونسل (آئی ایم سی) کے سربراہ مولانا توقیر رضا کے خلاف پولیس نے مقدمہ درج کیا ہے۔

ریاست اترپردیش کے ضلع سنبھل کے ایس پی یمنا پرساد نے بتایا کہ 'مولانا توقیر رضا نے 16 فروری کو سنبھل میں شہریت ترمیمی قانون (سی اے اے) کی مخالفت میں احتجاجی مظاہرے سے خطاب کرتے ہوئے مودی، شاہ اور یوگی کے خلاف متنازع بیان دیا تھا۔ جس کا نوٹس لیتے ہوئے نخاسا تھانے کے داروغہ رام بھول کی شکایت پر پولیس نے مقدمہ درج کیا ہے۔'

الزام یہ ہے کہ توقیر رضا نے نریندر مودی، وزیر داخلہ امت شاہ اور وزیر اعلی یوگی آدتیہ ناتھ کے لیے ’ڈھونگی‘ جیسے لفظوں کا استعمال کیا تھا۔ پولیس نے اس ضمن میں نخاسا تھانے میں دفعات 504،505 اور 435 اے کے تحت مقدمہ درج کیا گیا ہے۔