Urdu Book Released in UP Assembly اترپردیش اسمبلی میں مجموعہ غزل 'منتظر نگاہوں میں' کا رسم اجرا

غزلوں کا یہ مجموعہ قانون ساز کونسل کے اسپیشل سکریٹری اور فائنسس کنٹرولر شری کرشن دت ڈونڈیال نے لکھا ہے جس کا رسم الخط ہندی ہے۔ اس میں اردو الفاظ کی مدد سے سماج اور زندگی کے مختلف مراحل کو سمیٹنے کی کوشش کی گئی ہے۔

لکھنؤ: اترپردیش اسمبلی کے راج رشی پروشوتم داس ٹنڈن ہال میں آج ایک مجموعہ غزل 'منتظر نگاہوں میں' کا اجرا چیئرمین ریاستی قانون ساز کونسل کنور مانویندر سنگھ کے ذریعہ کیا گیا۔ یہ مجموعہ غزل، قانون ساز کونسل کے اسپیشل سکریٹری اور فائنسس کنٹرولر شری کرشن دت ڈونڈیال نے لکھا ہے جس کا رسم الخط ہندی ہے اور اس میں اردو الفاظ کی مدد سے زندگی کے مختلف مراحل اور متعد ایام کو سمیٹنے کی کوشش کی گئی ہے۔ تقریب اجراء کے موقع پر چیئر مین کنور مانویندر سنگھ نے کہا کہ غزل ادب کی ایک صنف ہے، جو ملک کی ثقافتی وراثت سے مالا مال ہے۔ اس کتاب کے توسط سے لوگ زندگی کو بہتر طریقہ سے سمجھ سکیں گے۔

انہوں نے رسم اجرا کے موقع پر مصنف کو مبارکباد پیش کرتے ہوئے غزل گوئی صنف پر روشنی ڈالی۔ انہوں نے کہا کہ معاشرتی مسائل کو اشعار میں پرونا اور زندگی پیچ و خم کو بیان کرنا انتہائی مشکل ہوتا۔ اس فن کو زندہ رکھنے میں ایسے منصفین کا اہم کردار ہوتا ہے۔ کتاب کی رسم اجراء کے موقع پر ریاستی قانون ساز کونسل کے پرنسپل سکریٹری ڈاکٹر راجیش سنگھ اور دیگر افسران، ملازمین اور معززین موجود رہے۔