بارہ بنکی : یوتھ کانگریس کا بلاک سطح پر 'نوکری سنواد' پروگرام کا اعلان

بی جے پی حکومت کی غلط پالیسیوں کی وجہ سے مختلف کارخانے اور صنعتیں بند ہو رہی ہیں جس سے نوجوان پریشان ہیں۔

اترپردیس کے بارہ بنکی میں یوتھ کانگریس کی جانب سے 'نوکری سنواد' کا اہتمام کیا جائے گا۔ اس پروگرام کے ذریعے یوتھ کانگریس بی جے پی حکومت کو روزگار کے مسئلے پر گھیرنے کی کوشش کرے گی۔

اس تعلق سے آج بارہ بنکی کے ضلع کانگریس دفتر میں یوتھ کانگریس کے ریاستی سکریٹری اور ضلع یوتھ کانگریس کے انچارج شویندر پانڈے نے بتایا کہ 'بی جے پی حکومت کی غلط پالیسیوں کی وجہ سے تمام تر کارخانے اور دیگر صنعتیں بند ہو رہی ہیں جس سے نوجوان تشویش میں ہیں۔'

انہواں نے کہا کہ یوتھ کانگریس کا نوکری سنواد تقریبا 45 روز تک چلے گا جس میں تمام بلاک اور شہری ہیڈ کوارٹر پر اس کا اہتمام کیا جائے گا۔

شیویندر پانڈے نے یہ بھی دعویٰ کیا کہ یوپی میں ہر روز تین نوجوان بیروزگاری کے سبب خودکشی کرتے ہیں۔ اعداد و شمار کے مطابق 30 برسوں میں 1000 سے زائد کارخانے بند ہوئے ہیں۔

'سی ایم آئی ای' کی اعداد و شمار کے مطابق 2019 میں بیروزگاری کی شرح 8.4 تھی جو 2020 میں 5 گنا ہوگئی ہے۔

شیویندر پانڈے نے کہا کہ ریاست میں بے روزگاری کے اعداد و شمار سے پتا چل رہا ہے کہ نوجوان تشویش میں ہیں۔ لیکن حکومت اس پر غور نہیں کر رہی ہے۔