Lakhimpur Violence: ورون گاندھی کا وزیراعظم کے نام خط

ورون گاندھی نے وزیر اعظم کو لکھے خط میں مطالبہ کیا ہے کہ کسان تحریک (Farmers Movement) میں ہلاک ہونے والے کسان بھائیوں کے اہل خانہ کو ایک ایک کروڑ روپے کا معاوضہ دیا جائے۔

تینوں زرعی قوانین (Farm Laws) کو واپس لینے کے اعلان کے بعد ریاست اتر پردیش کے پیلی بھیت سے بی جے پی کے رکن پارلیمان ورون گاندھی (Varun Gandhi) نے بھی پرینکا گاندھی کی طرح وزیر اعظم نریندر مودی کو خط لکھا ہے۔

ورون گاندھی نے وزیر اعظم نریندر مودی کو خط (Varun Gandhi Writes Letter to PM Modi) بھیج کر زرعی قوانین کو واپس لینے کے اعلان کا خیر مقدم کیا ہے اور ایم ایس پی پر قانون بنانے سمیت دیگر مسائل پر فوری فیصلہ کرنے کا مطالبہ کیا۔

ورون گاندھی کا وزیراعظم کے نام خط

وزیراعظم کو بھیجے گئے خط میں ورون گاندھی نے لکھا ہے کہ 'کسانوں کی ایک بڑی تحریک ملک بھر میں گزشتہ ایک سال سے تین زرعی قوانین کو منسوخ کرنے اور فصلوں کی کم از کم امدادی قیمت کی قانونی گارنٹی کے مطالبہ کو لے کر چل رہی ہے۔ ورون گاندھی نے لکھا کہ 'آپ کا شکریہ ادا کرتا ہوں کہ آپ نے ان قوانین کو منسوخ کرنے کا اعلان کیا۔'

گزشتہ ایک سال میں اس تحریک میں 700 سے زائد کسان بھائی اس احتجاج میں ہلاک ہو چکے ہیں۔ انہوں نے مزید لکھا ہے کہ مجھے یقین ہے کہ اگر یہ فیصلہ پہلے کر لیا جاتا تو اتنا بڑا جانی نقصان نہ ہوتا۔'

ورون گاندھی نے لکھا ہے کہ آپ سے درخواست ہے کہ کسان تحریک میں ہلاک ہونے والے کسان بھائیوں کے اہل خانہ کو ایک ایک کروڑ روپے کا معاوضہ دیا جائے۔ اس تحریک کے دوران کسان بھائیوں کو ہراساں کرنے پر جو فرضی ایف آئی آر درج کی گئی ہیں انہیں بھی فوری طور پر منسوخ کیا جائے۔'

بی جے پی کے رکن پارلیمان ورون گاندھی نے لکھا ہے کہ سینئر عہدوں پر بیٹھے کئی لیڈروں نے احتجاج کرنے والے کسانوں کے بارے میں انتہائی تکلیف دہ بیانات دیے ہیں۔ اسی کا نتیجہ ہے کہ 3 اکتوبر کو لکھیم پور کھیری میں پانچ کسان بھائیوں کو گاڑیوں سے کچل کر ہلاک کر دیا گیا۔

ورون گاندھی نے خط میں لکھا ہے کہ میں آپ سے درخواست کرتا ہوں کہ اس واقعے میں ملوث مرکزی وزیر مملکت برائے داخلہ کے خلاف منصفانہ تحقیقات اور سخت کارروائی کی جائے۔'

بی جے پی کے رکن پارلیمان ورون گاندھی نے لکھا کہ 'مجھے امید ہے کہ آپ اس معاملے میں جلد کوئی ٹھوس فیصلہ لیں گے۔'