قبرستانوں اور خانقاوں کی زمین پر ناجائز قبضہ کرنے والوں کے خلاف بابا کا بلڈوزر چلے گا

میرٹھ میں بی جے پی اقلیتی مورچہ کے قومی صدر جمال صدیقی کی قیادت میں مغربی اتر پردیش کے مختلف اضلاع سے نو منتخب مورچہ کے عہدے داران کے ساتھ ایک میٹنگ منعقد کی گئی۔ اس میٹنگ میں کئی اہم فیصلے لئے گئے۔ BJP Minority President

میرٹھ:ریاست اتر پردیش میں صوفی ازم کو بڑھانے کے ساتھ ملک میں بھائی چارے کا ماحول بنانے کے مقصد سے بی جے پی اقلیتی مورچہ کی جانب سے ایک بڑی مہم کی شروعات کرنے جا رہی ہے. بی جے پی اقلیتی مورچہ کے قومی صدر جمال صدیقی کی قیادت میں صوبے بھر میں صوفی سنواد مہا ابھییان کے تحت خانقاہوں اور درگاہوں کے ذریعے ہندو اور مسلمان کے درمیان بن رہی دوری کو ختم کرنے کی قوشش کی جائے گی تاکہ ملک میں امن و سلامتی کو قائم کیا جا سکے۔

ای ٹی وی بھارت اردو کے ساتھ خاص گفتگو کے دوران اقلیتی مورچہ کے قومی صدر جمال صدیقی نے کہا کہ صوبے میں جہاں کہیں بھی درگاہوں یا خانقاہوں پر ناجائز قبضہ کرنے والوں کے ساتھ اب یوگی حکومت سختی کے ساتھ درگاہوں مزاروں اور خانقاہوں پر قبضے ہٹانے کا کام کرے گی کیونکہ یوپی میں بابا کا بلڈوزر اب ایسے لوگوں کو بخشے گا نہیں۔

وہیں دوسری جانب جمال صدیقی نے کہا کہ جس طرح یوپی میں پچھلی سماجوادی حکومت نے قبرستان کی باؤنڈری وال کا کام کرایا تھا اس کو بھی دوبارہ شروع کیے جانے کی ضرورت ہے تاکہ قبرستان کی زمین پر ناجائز قبضے روکے جا سکے۔ سماجوادی کی حکومت پر الزام تراشی کرتے ہوئے مورچہ کے قومی صدر جمال صدیقی نے کہا کہ جس طرح پچھلی سرکار نے قبرستان کی باؤنڈری وال کے نام پر قبرستان کی زمین کی آراضی کے اندر دیواریں بنانے کا کام کیا اس میں کافی جگہوں پر ناجائز قبضے ہونے کی شکایت ملی تھی۔