'اعلیٰ حضرت حج ہاؤس اعظم خان کے سبب بحران کا شکار ہوا'

بی جے پی کے مسلم رہنماؤں نے کہا کہ اگر وہ اعلیٰ حضرت ہاؤس معاملے پر یوگی حکومت سے بات نہ کی ہوتی تو شاید یہ معاملہ اب بھی حل نہیں ہوا ہوتا۔

ریاست اترپردیش کے ضلع غازی آباد میں واقع اعلی حضرت حج ہاؤس کو دوبارہ کھولنے کے فیصلہ کو خوش آئند قرار دیتے ہوئے بی جے پی کے سینئر رہنما اور حج کمیٹی آف انڈیا کے رکن محمد عرفان احمد نے کہا کہ اعلی حضرت حج ہاؤس کا معاملہ صرف ایک نادان وزیر کی وجہ سے خراب ہوا۔

انہوں نے کہا کہ آگر وہ وزیر نادان نہ ہوتے تو اعلیٰ حضرت حج ہاؤس کبھی بحران کا شکار نا ہوتا۔

انہوں نے سماج وادی پارٹی کے رہنما اعظم خان پر نکتہ چینی کرتے ہوئے انکو نادان قرار دیا۔

واضح ہو کہ اعلیٰ حضرت حج ہاؤس کا پروجیکٹ اعظم خان کی خصوصی توجہ کی وجہ سے مکمل ہوا تھا اور اسی وجہ سے حج ہاؤس تنازعات کےدائرے میں آ گیا تھا۔

بی جے پی کے قریبی ذرائع کا کہنا ہے کہ اگر بی جے پی کے مسلم رہنما اس معاملہ پر یوگی حکومت سے بات نہ کرتے تو شاید ابھی تک یہ معاملہ حل نہ ہوتا۔