ارون سنگھ راجیہ سبھا کے امیدوار

تنظیم فاطمہ کے مستعفیٰ ہونے کے بعد ارون سنگھ کو راجیہ سبھا کے ضمنی الیکشن میں بی جے پی کے امیدوار کے طور پر میدان میں اتارا گیا ہے۔

بھارتیہ جنتا پارٹی (بی جے پی) نے راجیہ سبھا میں اترپردیش سے سماجوادی پارٹی کی رہنما اور راجیہ سبھا رکن محترمہ تنظیم فاطمہ کے مستعفیٰ ہونے کے سبب ان کی سیٹ پر ہونے والی راجیہ سبھا ضمنی الیکشن میں بی جے پی کے جنرل سیکریٹری ارون سنگھ کو امیدوار بنایا گیا ہے۔

پارٹی کی مرکزی انتخابی کمیٹی نے آج کرناٹک اور اترپردیش سے راجیہ سبھا کی دو خالی سیٹوں کے لیے امیدواروں کا اعلان کیا۔

واضح رہے کہ اترپردیش سے مسٹر سنگھ کو جبکہ کرناٹک سے کے سی رام مورتی کو امیدوار بنایاگیا ہے۔

اترپردیش میں حالیہ منعقد ہونے والے اسمبلی انتخابات میں محترمہ فاطمہ نے سماجوادی پارٹی (ایس پی) کے ٹکٹ پر رام پور سیٹ پر جیت درج کرنے کے بعد انہوں نے راجیہ سبھا سے استعفیٰ دے دیا تھا۔

کرناٹک میں کانگریس کی جانب سے رکن پارلیمنٹ رہنے والے مسٹر رام مورتی نے کانگریس اور راجیہ سبھا دونوں سے استعفیٰ دینے کے بعد بی جے پی کی رکنیت حاصل کی تھی۔

مسٹر رام مورتی کی مدت کار جون سنہ 2022 تک تھی، اسی لیے بی جے پی نے ان کی وجہ سے خالی ہونے والی سیٹ پر انھیں کو امیدوار بنایا ہے۔

بارہ دسمبر کو ہونے والے راجیہ سبھا ضمنی الیکشن کے لیے پیر کو نوٹیفکیشن جاری ہوا تھا۔

واضح رہے کہ پرچہ نامزدگی داخل کرنے کی آخری تاریخ دو دسمبر ہے، جبکہ پرچہ نامزدگی کی جانچ اگلے دن ہوگی، اور ووٹوں کی گنتی 12 دسمبر کو ہی ہوگی، اور الیکشن کے نتائج کا اعلان کیا جائے گا۔