مظفرنگر کی تمام منڈیوں پر کسان یونین کا احتجاج

بھارتی کسان یونین کے کارکنان نے تینوں زرعی قوانین کے خلاف مظفرنگر کی تمام منڈیوں پر احتجاجی مظاہرہ کیا۔

ریاست اترپردیش کے ضلع مظفرنگر کے کوکڑا بلاک میں واقع ایشیا کی نمبر ایک منڈی میں سینکڑوں بھارتی کسان یونین کے کارکنان نے متحدہ کسان مورچہ کی کال پر احتجاجی مظاہرہ کیا اور وزیر اعظم کے نام انتظامیہ کو میمورنڈم بھی پیش کیا۔

اس سے متعلق مزید معلومات دیتے ہوئے کسان رہنما نے بتایا کہ آج متحدہ کسان مورچہ کی کال پر ہم نے مظفرنگر کی تمام منڈیوں میں پرامن احتجاجی مظاہرہ کیا ہے۔ منڈیوں کو بند کرنے کی حکومت کی جو نیت ہے، اس کے خلاف ضلع میں موجود تمام منڈیوں پر احتجاجی مظاہرے کیے گئے۔ متحدہ کسان مورچہ کی کال پر اس احتجاج کی شروعات کی گئی اور مظفر نگر انتظامیہ کو وزیر اعظم کے نام ایک میمورینڈم بھی پیش کیا گیا۔

اس میمورنڈم میں مطالبہ کیا گیا کہ حکومت اس ملک کو برباد نہیں کرے اور اس ملک میں کسانوں کو خودکشی کرنے پر مجبور نہیں کرے۔ حکومت کو اس پر سوچنا اور سمجھنا چاہیے۔ یہاں پر ہم نے مظاہرہ کرتے ہوئے وزیراعظم کے نام مظفرنگر ایس ڈی ایم کو ایک میمورنڈم پیش کیا ہے۔

انہوں نے مزید کہا کہ اگر حکومت کا رویہ ایسا ہی رہا تھا تو آئندہ انتخابات میں کسان اپنے ووٹ کا استعمال کرکے اس حکومت کو جواب دے گی۔حکومت ہمارے مطالبہ ماننے کو تیار نہیں ہے، اس لیے 26 مارچ کو ملک گیر چکہ جام کیا جائےگا۔