راکیش ٹکیت کو جان سے مارنے کی دھمکی، شکایت درج

بھارتی کسان یونین کے قومی ترجمان راکیش ٹکیت کو نامعلوم شخص سے فون پر جان سے مارنے کی دھمکی ملی ہے۔ یہ کوئی سازش ہے یا مذاق یا سچائی ہے، یہ تو پولس تفتیش میں معلوم گا۔ تاہم ٹکیت نے غازی آباد کے تھانہ کوشامبی میں تحریری شکایت درج کرائی ہے اور پولیس انکوائری میں مصروف ہو گئی۔

راکیش ٹکیت نے بتایا کہ فون کرنے والے نے پوچھا کہ تمہیں کتنے اسلحہ کی ضرورت ہے، ہم تمھیں مہیا کرائیں گے۔ جس پر انہوں نے کہا بھائی مجھے اسلحہ کی ضرورت نہیں ہے۔

جواب میں فون والے نے کہا کہ تمھیں چھوڑیں گے نہیں، تمہاری جان لیں گے۔ فون کرنے والا اپنا تعلق بہار سے بتا رہا تھا۔

راکیش ٹکیت نے کہا کہ یہ کسی سر پھرے کی فون کال تھی، پھر بھی ہم نے پولیس کو مطلع کردیا ہے تاکہ کسی نا خوشگوار واقعے سے بچا جا سکے۔

پولیس نے ٹیم تشکیل دے کر سرویلانس کے ذریعے نامعلوم افراد کو ٹریک کرنا شروع کردیا۔ غازی آباد دہلی سرحد پر زرعی قوانین کے خلاف بطورِ احتجاج راکیش ٹکیت کے ساتھ کسانوں کی بڑی تعداد موجود ہے، جو دہلی سرحد پر ڈیرے ڈالے ہوئے ہے۔