بارہ بنکی : دہلی کی طرز پر یوپی میں بھی پرالی سے کھاد بنانے کا مطالبہ

ریاست اتر پردیش کے ضلع بارہ بنکی میں راشٹریہ بھارتیہ اکھنڈ پارٹی کی جانب سے یہ مطالبہ کیا گیا کہ دہلی کے طرز پر یو پی میں پرالی سے کھاد بنوائی جائے۔

اس کے علاوہ مناسب قیمتوں مین دھان خرید کو لیکر راشٹریہ بھارتیہ اکھنڈ پارٹی نے ایک روزہ دھرنا دیا۔

پارٹی نے انتباہ کیا ہے کہ اگر ان کے مطالبات پر غور نہیں کیا گیا تو وہ بڑا احتجاج کرنے کو مجبور ہوں گے۔

بارہ بنکی کے گنا دفتر پر احتجاج کر رہے راشٹریہ بھارتیہ اکھنڈ پارٹی کے اراکین نے احتجاج کے بعد وزیراعلیٰ یوگی آدیتہ ناتھ کو ضلع مجسٹریٹ کے ذریعہ ایک میمورنڈم بھیجا ہے۔

پارٹی کے قومی صدر ارون کمار آزاد کا الزام ہے کہ کسان ان دنوں 8-10 روپیہ کلو کے حساب سے دھان فروخت کرنے کو مجبور ہیں۔

انہوں نے کہا کہ حکومت کی جانب سے دھان کی قیمت 1850 روپیہ فی کوئنٹل مقرر کی گئی ہے۔

ارون کمار آزاد نے اس کے علاوہ دہلی کی طرز پر دھان کی پرالی کھیت میں ہی کیمکل ڈال کر اس کی کھاد بنانے کا مطالبہ کیا ہے۔

اس کے علاوہ انہوں نے ریاست میں لگے اسمارٹ میٹر کے خلاف بھی آواز بلند کی ہے۔ ان کے مطابق اس کی وجہ سے بجلی صارفین مزید پریشان ہیں۔