لکھنؤ میں 'بھارت بند' کا اثر، دکانوں میں تالا لگا رہا

سی اے اے اور این آر سی کے خلاف لکھنؤ میں 'بھارت بند' کا اثر صاف طور پر دیکھا جا سکتا ہے۔ شہر کے پرانے علاقوں میں بازار، دوکانیں سب بند ہیں۔

ریاست اترپردیش کی دارلحکومت لکھنؤ میں 'بھارت بند' کی اپیل پر کثیر تعداد میں دوکانداروں نے اپنی دکانوں میں تالا لگائے رکھا، سی اے اے اور این آر سی کے خلاف ملک بھر کی مختلف تنظیموں نے بھارت بند کا اعلان کیا تھا، جس کا اثر دارالحکومت لکھنؤ میں بھی دیکھنے کو مل رہا ہے۔

شہر کے پرانے علاقوں کی بات کریں تو چوک، اکبری گیٹ، امین آباد، حسین آباد میں زیادہ تر دکانیں بند ہیں، جو دکانیں کھلی ہیں ان میں پھل اور سبزی بیچنے والوں کی تعداد ہے۔

سویگی میں کام کرنے والے وسیم خان نے ای ٹی وی بھارت سے بات چیت کے دوران کہا کہ آج بھارت بند کی وجہ سے ابھی تک ہمیں کوئی آرڈر نہیں ملا جبکہ اس کے برعکس دوسرے دنوں میں بہت زیادہ آرڈر ملتے تھے۔

رہائی منچ کے صدر ایڈوکیٹ شعیب نے کہا کہ رہائی منچ ان تنظیموں کے ساتھ ہے جو جمہوریت پر یقین رکھتے ہوں اور اس کے تحفظ کے لئے سی اے اے اور این آر سی کے خلاف بھارت بند کی حمائت کرتے ہوں۔

ایک طرف جہاں پرانے شہر میں بازار بند ہیں تو دوسری جانب حضرت گنج، گومتی نگر علاقوں میں بھارت بند کا اثر دیکھنے کو نہیں ملا۔

واضح رہے کہ 'بھارت بند' کا اعلان اس لیے کیا گیا تاکہ اس کے سبب حکومت پر دباؤ بنایا جا سکے اور وہ متنازع قانون کو واپس لے لے۔