فخر مشرق علامہ شفیق جونپوری کی یاد میں طرحی نشست کا اہتمام جونپور:ریاست اترپر دیش کے جانپور کے محلہ سپاہ جامعہ نگر میں واقع اردو گھر میں بزم حففیظ چونپوری کے زیر اہتمام علامہ شفیق جونپوری کی یاد میں ایک طرحی نشست کا انعقاد کیا جس میں شہرکے مختلف علاقوں سے ادب سے تعلق وابستہ شخیصات نے شرکت کی۔
علامہ شفیق جونپوری کی یاد میں ایک طرحی نشست کا انعقاد استاد شاعر عبرت مچھلی شہری کی صدارت میں انعقاد کیا گیا۔ پروگرام کا آغاز شاعر انصار جونپوری نے نعت رسول پیش کرکے کیا۔ بزم حفیظ جونپوری کے صدر اسیم مچھلی شہری نے چند دن قبل فخر مشرق شاعر مرحوم علامہ شفیق جونپوری کا مصرع طرح 'میں تھا کہاں کہ مجھ کو کسی نے مٹا دیا' پیش کیا جس پر تمام شعرا نے طبع آزمائی کی۔
مہمان خصوصی کے طور پر جامعہ گروپ آف ایجوکیشن کے چئیرمن مولانا انوار احمد قاسمی اور مہمان اعزازی کے طور پر شاعر انوار الحق انوار جونپوری نے شرکت کیا۔
عرفان جونپوری نے شاعر علامہ شفیق جونپوری پر تبصرہ کرتے ہوئے کہا کہ شیراز ہند جونپور کے شعری منظر نامے پر جن شعراء نے گہری چھاپ چھوڑی۔ ان میں فخر مشرق علامہ شفیق جونپوری کا نام نہ صرف جونپور بلکہ تقسیم سے قبل ہندوستان میں روشن و ممتاز رہا ہے۔ آج بھی علامہ شفیق کے ذکر کے بغیر جونپور کے اردو شعراء کی فہرست مکمل نہیں ہو سکتی ہے۔ وہیں محمد تبریز نے علامہ شفیق جونپوری کی ایک غزل بھی ترنم سے پیش کی۔
منتخب اشعار قارئین کی نذر ہیں
دست حنائی آپ کا چمکا نہیں یونہی
میں نے حنا میں خون وفا کا ملا دیا
عبرت مچھلی شہری
حیرت سے دیکھتی ہے مجھے چشمِ میکدہ
جب سے کسی نے جام محبت پلا دیا
اکرم جونپوری
اس کی نظر کا بوجھ چلو کچھ تو کم ہوا
مجھکو بھی آج اسنے نظر سے گرا دیا
اسیم مچھلی شہری
غیروں کو کیا غرض کہ جلاتے میرا چمن
اپنا تھا کوئی آگ کو جس نے ہوا دیا
انوار احمد قاسمی
میں سو رہا تھا اوڑھ کے چادر نصیب کی
گھر کی ضرورتوں نے اچانک جگا دیا
احمد عزیز غازیپوری
یہ بھی پڑھیں:Yogi Adityanath Speech وزیر اعلیٰ یوگی آدتیہ ناتھ کے بیان پر ڈاکٹر شفیق الرحمان برق کا ردعمل
علاوہ ازیں احساس عباس،مظہر آصف،خلیل ابنِ اثر جونپوری،قاری ضیاء جونپوری،انصار جونپوری،نوجوان شاعر وسیم جونپوری،ڈاکٹر پی سی وشوکرما ،عاشق جونپوری،منور علی گمنام جونپوری،امرت پرکاش جونپوری،نادم جونپوری،وبھا تیواری نے اپنا کلام پیش کیا۔پروگرام کی نظامت شاعر شہزاد جونپوری نے فرمائی۔ اس موقع پر ڈاکٹر ابو اکرم قاسمی،ڈاکٹر عرشی نواز،ساجد انوار،ماجد انوار،محمد اکرم،پرویز جونپوری،محمد اعظم نے خصوصی طور پر شرکت کی۔
