Honors to MLA Ata-ur-Rehman: بریلی حج سیوا سوسائٹی نے نومنتخب رکن اسمبلی عطاء الرحمٰن کا استقبال کیا

ضلع بریلی کے بہیڑی اسمبلی سیٹ سے جیت حاصل کرنے والے سماج وادی پارٹی کے عطاء الرحمٰن کا بریلی حج سیوا سوسائٹی کے عہدے داران اور کارکنان نے استقبال کیا۔ Bareilly hajj seva society honours Ata-ur-Rehman

اتر پردیش اسمبلی انتخابات 2022 کے نتائج میں بی جے پی نے ضلع بریلی میں نو سیٹیوں میں سے سات سیٹوں پر کامیابی حاصل کی ہے، جب کہ سماج وادی پارٹی نے دو اسمبلی سیٹوں پر جیت حاصل کی ہے۔ خاص بات یہ ہے کہ سماج وادی پارٹی کے جیتنے والے دونوں امیدوار مسلم ہیں اور پچھلی حکومتوں میں وزیر بھی رہ چکے ہیں۔ BJP won seven seats in Bareilly

بریلی ضلع میں کل نو اسمبلی سیٹیں ہیں، جن میں آنولا، بیتھری چین پور، بریلی شہر، بریلی کینٹ، فرید پور، میر گنج، نواب گنج، بہیڑی اور بھوجی پورہ شامل ہیں۔ یہاں سے سماج وادی پارٹی نے صرف بہیڑی اور بھوجی پورہ سیٹوں پر جیت حاصل کی ہے۔ Total nine assembly constituencies in Bareilly

بہیڑی اسمبلی سیٹ پر سماج وادی پارٹی کے عطاء الرحمٰن نے بی جے پی کے ریونیو وزیر چھترپال گنگوار کو شکست دی، جب کہ بھوجی پورہ میں سماج وادی پارٹی کے شہزل اسلام نے بی جے پی کے بہورن لال موریہ کو شکست دی ہے۔ SP won Two seats in Bareilly

بہیڑی اسمبلی سیٹ پر سماجوادی پارٹی کے امیدوار عطاء الرحمٰن کی جیت کئی حوالوں سے غیر متوقع ہے۔ عطاء الرحمٰن کو کل 1لاکھ 23 ہزار 639 ووٹ ملے، جب کہ بی جے پی کے ریونیو وزیر چھترپال گنگوار کو 1 لاکھ 20 ہزار 457 ووٹ ملے ہیں۔ یہاں عطاء الرحمٰن نے 3 ہزار 182 ووٹوں سے کامیابی حاصل کی ہے۔ مزید دلچسپ بات یہ ہے کہ یہاں عطاء الرحمٰن کو تقریباً 80 ہزار مسلم ووٹوں کے علاوہ ہر طبقہ سے تقریباً 43 ہزار ووٹ ملے ہیں۔

عطاء الرحمٰن سماجی خدمت کے میدان میں بھی بڑھ چڑھ کر حصہ لیتے ہیں۔ وہ بریلی حج سیوا سوسائٹی کے صدر ہیں۔ گزشتہ روز بریلی حج سیوا سوسائٹی کے عہدے داران اور کارکنان نے عطاء الرحمٰن کا استقبال کیا۔

بریلی حج سیوا سوسائٹی ہر سال عازمین حج کے لیے تربیتی کیمپ کا اہتمام کرتی ہے۔ جس میں عازمین حج کو سفرِ حج پر جانے سے قبل حج کے ارکان کی تربیت دی جاتی ہے۔ یہ کیمپ شہر کے مختلف مسلم اکثریتی علاقوں میں منعقد کیے جاتے ہیں۔

عطاء الرحمان کا کہنا ہے کہ 'عازمین کو تربیت یا سہولیات فراہم کرنے کا کام فی سبیل اللہ کیا جاتا ہے اور یہ ہماری کمیٹی کا مشغلہ بھی ہے۔' MLA Ata ur Rehman on Bareilly Hajj seva society

بہرحال، اسمبلی انتخابات میں فرقہ واریت کا رنگ چڑھنے کے بعد بھی بہیڑی میں عطاء الرحمٰن کا مسلم ووٹوں کے علاوہ کثیر تعداد میں تمام طبقات کے ووٹ حاصل کرنا ثابت کرتا ہے کہ مثبت اور بامقصد کوششیں، عوام کے درمیان بھائی چارے اور اتحاد کی مسلسل کوششوں کے ساتھ ساتھ سیاسی سفارت کاری کی شمولیت اور ہم آہنگی سے فتح کی مشکل راہ کو بھی آسان کیا جا سکتا ہے۔